इराणचे परराष्ट्र मंत्री वरिष्ठ शिष्टमंडळासह इस्लामाबादमध्ये दाखल

इराणचे परराष्ट्र मंत्री अब्बास अराघची शुक्रवारी एका वरिष्ठ शिष्टमंडळासह इस्लामाबादमध्ये दाखल झाले. या घटनेमुळे इराण आणि अमेरिका यांच्यातील रखडलेल्या वाटाघाटींना पुन्हा चालना देण्यासाठी नव्याने राजनैतिक प्रयत्न सुरू झाल्याचे संकेत मिळाले आहेत.

एका वरिष्ठ इराणी अधिकाऱ्याने पुष्टी केली आहे की, यावेळी अमेरिका- इराण थेट चर्चा होणार नाही आणि पाकिस्तान अप्रत्यक्ष मार्गाने तेहरानच्या चिंता आणि भूमिका वॉशिंग्टनपर्यंत पोहोचवेल.

अधिकाऱ्यांनी सांगितले की, अराघची आपल्या दौऱ्यादरम्यान पाकिस्तानचे पंतप्रधान शहबाज शरीफ आणि लष्करप्रमुख जनरल आसिम मुनीर यांची भेट घेण्याची शक्यता आहे. पाकिस्तानचे परराष्ट्र मंत्री, इशाक दार यांनी त्यांच्या एक्स हँडलवर अराघची आणि त्यांच्या सहकाऱ्यांच्या आगमनाचे फोटो पोस्ट केले आहेत, ज्यामध्ये ते फील्ड मार्शल मुनीर आणि गृहमंत्री मोहसिन नक्वी यांच्यासोबत इराणी शिष्टमंडळाचे स्वागत करताना दिसत आहेत.

सार्वजनिक मुत्सद्देगिरी केंद्राचे प्रमुख आणि इराणच्या परराष्ट्र मंत्रालयाचे प्रवक्ते इस्माईल बाकाई यांनी एक्सवरील एका पोस्टमध्ये सांगितले की, इराणी शिष्टमंडळ अधिकृत भेटीसाठी इस्लामाबादमध्ये दाखल झाले आहे. त्यांनी सांगितले की, 'अमेरिकेने लादलेले आक्रमक युद्ध' असे वर्णन केलेल्या गोष्टीचा अंत करणे आणि प्रदेशात शांतता प्रस्थापित करणे या उद्देशाने पाकिस्तानच्या सुरू असलेल्या मध्यस्थी प्रयत्नांचा भाग म्हणून परराष्ट्र मंत्री अब्बास अराघची वरिष्ठ पाकिस्तानी अधिकाऱ्यांसोबत बैठका घेतील. बाकाई यांनी स्पष्ट केले की इराण आणि अमेरिका यांच्यात कोणतीही बैठक नियोजित नाही, तसेच तेहरानची मते आणि चिंता पाकिस्तानमार्फत वॉशिंग्टनपर्यंत पोहोचवल्या जातील.

अमेरिकादेखील राजनयिक संबंध प्रस्थापित करण्याची तयारी करत असून, विशेष दूत स्टीव्ह विटकॉफ आणि जेरेड कुशनर चर्चेसाठी इस्लामाबादमध्ये दाखल होण्याची शक्यता आहे. व्हाइट हाऊसच्या प्रेस सेक्रेटरी कॅरोलाइन लेविट यांनी या घडामोडीला दुजोरा दिला आणि सांगितले की, चर्चा थेटपणे होईल, परंतु पाकिस्तान त्यात मध्यस्थी करेल. त्यांनी पुढे सांगितले की, उपराष्ट्रपती जेडी व्हान्स हे वॉशिंग्टनमधूनच परराष्ट्र सचिव मार्को रुबियो आणि राष्ट्रीय सुरक्षा पथकाशी समन्वय साधत या प्रक्रियेत सहभागी राहतील.

अमेरिकेचे अध्यक्ष डोनाल्ड ट्रम्प यांनी सांगितले की, पाकिस्तानमध्ये शांतता चर्चा पुन्हा सुरू होण्याची शक्यता असताना, इराण अमेरिकेच्या मागण्या पूर्ण करण्याच्या उद्देशाने एक प्रस्ताव देण्याची तयारी करत आहे. त्यांनी पुनरुच्चार केला की, कोणत्याही संभाव्य करारामध्ये इराणने आपले संवर्धित युरेनियम सोडून देणे आणि होर्मुझच्या सामुद्रधुनीतून तेलाच्या वाहतुकीची मुक्तता सुनिश्चित करणे, या बाबींचा समावेश असलाच पाहिजे. अमेरिकेच्या राष्ट्राध्यक्षांनी पुढे सांगितले की, जोपर्यंत करार होत नाही तोपर्यंत अमेरिकन सैन्य इराणच्या बंदरांची नाकेबंदी सुरूच ठेवेल. नाकेबंदी उठवण्यासाठी कोणत्या अटी लागू होऊ शकतात, यावर इराणच्या प्रस्तावाचा आढावा घेतल्यानंतर निर्णय घेऊ, असे ट्रम्प म्हणाले.