रॉयटर्स या वृत्तसंस्थेचा दावा
मध्यपूर्वेत तणाव टोकाला पोहोचला असताना इराणवर झालेल्या सुरुवातीच्या हवाई हल्ल्यांत आयआरजीसी प्रमुख आणि संरक्षणमंत्री ठार झाल्याची माहिती Reuters या वृत्तसंस्थेने सूत्रांच्या हवालेने दिली आहे.
रॉयटर्सने तीन स्वतंत्र सूत्रांचा दाखला देत म्हटले आहे की, या अचूक लक्ष्यित कारवाईत इराणच्या उच्च लष्करी नेतृत्वावर मोठा आघात झाला. रॉयटर्सनुसार, इस्रायलने केलेल्या प्रारंभीच्या हवाई हल्ल्यांत इस्लामिक रिव्होल्युशनरी गार्ड कॉर्प्स - आयआरजीसीचे प्रमुख ठार झाले. आयआरजीसी ही इराणमधील सर्वात प्रभावशाली लष्करी संघटना मानली जाते आणि देशाच्या संरक्षण, गुप्तचर तसेच प्रादेशिक कारवायांमध्ये तिची प्रमुख भूमिका असते. त्यामुळे या प्रमुखाच्या मृत्यूमुळे इराणच्या सत्ताकेंद्रात मोठी पोकळी निर्माण होण्याची शक्यता व्यक्त केली जात आहे.
एमएमआरमध्ये आयुष्मान, जनआरोग्य योजनांसाठी रुग्णालयांची नोंदणी वाढवणार
हॉकर्स झोनमध्ये भरलेत बांगलादेशी, रोहिंगे…कोळी, आगरी, भंडारींनाही संरक्षण का नाही?
यूएईच्या केंद्रीय बँकेची मोठी डिजीटल कामगिरी
त्याच हल्ल्यांत इराणचे संरक्षणमंत्रीही मृत्युमुखी पडल्याचे सूत्रांनी रॉयटर्सला सांगितले. अधिकृत पुष्टी अद्याप इराण सरकारकडून झालेली नसली तरी, लष्करी तळांवर आणि संवेदनशील सरकारी इमारतींवर हल्ले झाल्याची माहिती समोर आली आहे. राजधानी तेहरानसह काही महत्त्वाच्या ठिकाणांना लक्ष्य करण्यात आले असल्याचे वृत्त आहे.
रॉयटर्सच्या अहवालानुसार, हे हल्ले पूर्वनियोजित आणि अत्यंत अचूक पद्धतीने करण्यात आले. इस्रायलने इराणच्या लष्करी क्षमतेला मोठा धक्का देण्याच्या उद्देशाने ही कारवाई केल्याचे विश्लेषकांचे मत आहे. इराण आणि इस्रायल यांच्यातील दीर्घकालीन तणावाच्या पार्श्वभूमीवर ही घटना घडली आहे.
या घटनेनंतर इराणमध्ये सुरक्षा व्यवस्था कडक करण्यात आली आहे. महत्त्वाच्या लष्करी ठिकाणी अतिरिक्त फौजफाटा तैनात करण्यात आला असून, देशांतर्गत माध्यमांवरही नियंत्रण वाढवण्यात आल्याचे सांगितले जाते. नागरिकांमध्ये चिंतेचे वातावरण असून, संभाव्य प्रत्युत्तर हल्ल्यांची चर्चा सुरू आहे.
आंतरराष्ट्रीय समुदायाने संयम बाळगण्याचे आवाहन केले आहे. संयुक्त राष्ट्रसंघासह अनेक देश परिस्थितीवर बारकाईने लक्ष ठेवून आहेत. या घटनेचा परिणाम केवळ इराण-इस्रायल संबंधांपुरता मर्यादित न राहता संपूर्ण मध्यपूर्वेतील स्थैर्यावर होऊ शकतो, अशी भीती व्यक्त होत आहे.
या वृत्तामुळे जागतिक स्तरावर खळबळ उडाली आहे. अधिकृत पुष्टी आणि तपशील पुढील काही तासांत स्पष्ट होण्याची शक्यता आहे. मात्र सुरुवातीच्या हल्ल्यांतच इराणच्या उच्च लष्करी नेतृत्वावर झालेला हा आघात परिस्थिती आणखी चिघळवू शकतो, हे स्पष्ट आहे.