अमेरिका-इराण तणावामुळे जागतिक बाजार पुन्हा अस्थिर
जागतिक बाजारात कच्च्या तेलाच्या किमतींमध्ये पुन्हा मोठी वाढ झाली आहे. सलग दोन दिवस घसरण झाल्यानंतर गुरुवारी तेलाच्या दरांनी जोरदार पुनरागमन करत प्रति बॅरल १०० डॉलरचा टप्पा पुन्हा पार केला.
अमेरिका आणि इराण यांच्यात सुरू असलेल्या तणावामुळे तसेच मध्यपूर्वेतील परिस्थिती अनिश्चित असल्याने जागतिक बाजारात पुन्हा चिंता वाढली आहे.
ब्रेंट क्रूडची किंमत १०१ डॉलरच्या पुढे गेली, तर अमेरिकन डब्ल्यूटीआय क्रूडही ९५ डॉलरच्या वर पोहोचले. काही दिवसांपूर्वी अमेरिका आणि इराण यांच्यात शांतता चर्चेची शक्यता निर्माण झाल्याने तेलाच्या किमतींमध्ये घसरण झाली होती. मात्र अद्याप कोणताही ठोस निर्णय न झाल्याने गुंतवणूकदार पुन्हा सावध झाले आहेत.
माझ्या मुलाच्या हत्येत तृणमूलचा हात…
अमेरिकन सैन्याकडून इराणी ध्वज असलेल्या रिकाम्या तेलवाहू जहाजावर हल्ला
पाकिस्तानी गुंडांच्या संपर्कातील दोघांना अटक
सुवेंदू अधिकारी यांच्या पीएच्या हत्येत बनावट नंबर प्लेटच्या गाडीचा वापर
अमेरिकेचे राष्ट्राध्यक्ष डोनाल्ड ट्रम्प यांनी इराणसोबत चर्चा सुरू असल्याचे सांगितले असले तरी परिस्थिती अजून पूर्णपणे नियंत्रणात नसल्याचे स्पष्ट केले आहे. दुसरीकडे इराणकडूनही काही प्रस्तावांना विरोध होत असल्याच्या बातम्या समोर येत आहेत. त्यामुळे मध्यपूर्वेत तणाव वाढण्याची शक्यता कायम आहे.
जगातील सर्वात महत्त्वाचा तेल वाहतूक मार्ग मानल्या जाणाऱ्या होर्मूज सामुद्रधुनीकडे सध्या संपूर्ण जगाचे लक्ष लागले आहे. या मार्गातून जगातील मोठ्या प्रमाणावर तेल पुरवठा केला जातो. येथे कोणताही अडथळा निर्माण झाल्यास जागतिक बाजारात तेलटंचाई निर्माण होऊ शकते. त्यामुळे या भागातील प्रत्येक घडामोडीचा थेट परिणाम तेलाच्या किमतींवर होत आहे.
याशिवाय अमेरिकेतील कच्च्या तेलाच्या साठ्यात सातत्याने घट होत असल्याचेही समोर आले आहे. अमेरिकन पेट्रोलियम इन्स्टिट्यूटनुसार, सलग तिसऱ्या आठवड्यात तेलसाठा कमी झाला आहे. त्यामुळे जागतिक बाजारात पुरवठ्याबाबत चिंता वाढली असून तेलाच्या दरांना आणखी आधार मिळाला आहे.
तेलाच्या किमती वाढल्यामुळे भारतासारख्या तेल आयात करणाऱ्या देशांवर आर्थिक दबाव वाढू शकतो. पेट्रोल-डिझेलचे दर वाढण्याची शक्यता निर्माण होते, तसेच महागाईवरही त्याचा परिणाम होऊ शकतो. वाहतूक खर्च वाढल्याने अनेक वस्तू महाग होण्याची भीती व्यक्त केली जात आहे.
तज्ज्ञांच्या मते, जर अमेरिका आणि इराण यांच्यातील चर्चा सकारात्मक दिशेने गेली तर तेलाच्या किमती पुन्हा कमी होऊ शकतात. मात्र तणाव वाढल्यास कच्च्या तेलाचे दर आणखी वाढण्याची शक्यता नाकारता येत नाही. त्यामुळे पुढील काही दिवस जागतिक तेल बाजारात मोठी चढ-उतार पाहायला मिळू शकते.