२०१८च्या जकार्ता एशियन गेम्समध्ये रौप्यपदक जिंकणाऱ्या पिंकीकडून यंदाही पदकाची अपेक्षा होती. उपांत्य फेरीत मात्र सुमिनने सुरुवातीपासूनच आक्रमक खेळ करत सामन्यावर वर्चस्व राखले. पिंकीला दोन इशाऱ्यांचा 'डक्की' मिळाला. त्यानंतर सुमिनने 'चाला' आणि 'योनबोश' मिळवत सामना ५-० असा जिंकला आणि अंतिम फेरीत प्रवेश केला.

पिंकीने उपांत्यपूर्व फेरीत दक्षिण कोरियाच्या लिमचा ३-० असा पराभव केला होता. या सामन्यात पिंकीने 'चाला' मिळवत गुणांची आघाडी घेतली, तर लिमला 'तानबेख'चा इशारा मिळाला.

पिंकीचे कांस्यपदक हे यंदाच्या एशियन गेम्समधील कुराशमध्ये भारताचे पहिले पदक ठरले. रविवारी भारतीय खेळाडूंना या क्रीडा प्रकारात एकही सामना जिंकता आला नव्हता.

पुरुषांच्या ९० किलोपेक्षा अधिक वजनी गटात विशालला उपांत्यपूर्व फेरीत थायलंडच्या कुनाथिप ये-ऑनकडून ०-५ असा पराभव पत्करावा लागला. महिलांच्या ५७ किलो गटात संगीता बल्हारा हिला फिलिपिन्सच्या चारमिया क्वेलिनोकडून ०-१० अशी हार स्वीकारावी लागली.

याच गटात भारतीचा प्रवास उपउपांत्यपूर्व फेरीतच थांबला. तर पुरुषांच्या ९० किलोपेक्षा अधिक गटात यश कुमार चौहानला ताजिकिस्तानच्या शकरममद मिरममदोवकडून ०-१० असा पराभव झाला.

२०१८मध्ये कुराशचा एशियन गेम्समध्ये प्रथम समावेश झाला, तेव्हा पिंकीने रौप्यपदक जिंकले होते. त्याआधी ती ज्युदो खेळाडू होती आणि २०१८च्या आशियाई ज्युनियर ज्युदो चॅम्पियनशिपमध्ये तिने सुवर्णपदक पटकावले होते. यंदा पुन्हा कुराशमध्ये पदक मिळवत पिंकीने एशियन गेम्समध्ये आपली पदकांची परंपरा कायम ठेवली.