या मोर्चादरम्यान टीपू सुलतानच्या समर्थनार्थ घोषणा दिल्याचा आरोप करण्यात येत आहे. ज्ञानेश कुमार यांच्या राजीनाम्याची मागणी करताना काही जणांनी कथितरीत्या 'हमें आजादी चाहिए, टीपू वाली आजादी' अशा घोषणा दिल्यामुळे वातावरण तापले. या प्रकरणावर काँग्रेस नेते विजय वडेट्टीवार यांनी केलेल्या विधानामुळे वादाला आणखी राजकीय वळण मिळाले आहे. टीपू सुलतानचा इतिहास चुकीच्या पद्धतीने मांडला जात असल्याचा दावा करत त्यांनी एखाद्याचे छायाचित्र लावणे किंवा आंदोलनात सहभागी होणे म्हणजे संबंधित व्यक्ती देशद्रोही ठरत नाही, असे म्हटले. दुसरीकडे, भाजप आणि शिवसेनेच्या शिंदे गटातील नेत्यांनी काँग्रेसवर टीका करत टिपू सुलतानला स्वातंत्र्यसैनिक मानण्यावरच प्रश्नचिन्ह उपस्थित केले आहे.

मालेगावमध्ये उपमहापौर शाने हिंद यांच्या कार्यालयात टीपू सुलतानचे छायाचित्र लावण्यात आल्यानंतर हा वाद सुरू झाला होता. त्यानंतर मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी संविधान बचाव समितीच्या वतीने निषेध मोर्चा काढण्यात आला. उपमहापौर शाने हिंद आणि समाजवादी पक्षाचे शहराध्यक्ष तसेच नगरसेवक मुस्तकीम डिग्निटी यांच्या नेतृत्वाखाली हा मोर्चा काढण्यात आला. या मोर्चादरम्यान टिपू सुलतानच्या समर्थनार्थ घोषणा दिल्याचा आरोप करण्यात आला. काही जणांनी कथितरीत्या 'हमें आजादी चाहिए, टिपू जैसी आजादी' आणि 'टिपू वाली आजादी' अशा घोषणा दिल्याचे वृत्त आहे. या घोषणांमुळे वाद अधिक तीव्र झाला आहे.

या प्रकरणावर समाजवादी पक्षाचे शहराध्यक्ष मुस्तकीम डिग्निटी यांनी आपली भूमिका मांडली. 'ज्यांनी टिपूचा इतिहास वाचलेला नाही, त्यांना टीपू कोण होता, हे माहीत नाही,' असे ते म्हणाले.

वडेट्टीवारांचे टिपूला समर्थन

मालेगावमधील घोषणांवरून सुरू झालेल्या वादात काँग्रेस नेते विजय वडेट्टीवार यांनी टिपू सुलतानची बाजू घेतली. टिपू सुलतानचा इतिहास चुकीच्या पद्धतीने मांडला जात असल्याचा दावा त्यांनी केला. नागपूर येथे माध्यमांशी बोलताना त्यांनी, 'टीपू सुलतान देशद्रोही होता का?' असा सवाल उपस्थित केला. वडेट्टीवार म्हणाले, 'टीपू सुलतान देशद्रोही होता का? त्याचा इतिहास चुकीच्या पद्धतीने मांडण्यात आला आहे. स्वातंत्र्याची मागणी करणे चुकीचे आहे का? प्रत्येकाला आपापल्या पद्धतीने स्वातंत्र्य हवे असते. मात्र, सध्या देशात ज्या प्रकारचे वातावरण आहे, ते पाहता कोणी स्वातंत्र्याची मागणी केली, तर प्रश्न निर्माण होतो की आपण आज लोकशाहीत आहोत का? आपण संविधान मानतो का?'

भाजप आणि शिंदेसेनेची भूमिका

विजय वडेट्टीवार यांच्या विधानावर भाजप आणि शिवसेनेच्या शिंदे गटातील नेत्यांनी आक्षेप घेतला. शिवसेना नेत्या शायना एनसी यांनी टीपू सुलतानला स्वातंत्र्यसैनिक म्हणून सादर करण्यावर प्रश्न उपस्थित केले. त्यांनी टीपू सुलतानला 'खलनायक' संबोधले. शायना एनसी म्हणाल्या, 'टिपू सुलतान हा स्वातंत्र्यसैनिक नव्हता. तो खलनायक होता. त्याने भारताचे नुकसान केले आणि महिलांवर बलात्कार केले.'

काँग्रेस टिपू सुलतानला ब्रिटिश वसाहतवादी सत्तेविरोधात लढणारा नेता आणि सक्षम प्रशासक म्हणून सादर करत असल्याचा आरोपही त्यांनी केला. तसेच धार्मिक छळाचा मुद्दा उपस्थित करत, अशा धोरणांमुळे जनतेचे हित साधले जात नाही, तर स्वार्थ साधला जातो, असा दावा त्यांनी केला.