अलेक्झांड्रोव्हाने सबालेन्काचा ७-६ (३), ४-६, ६-४ असा पराभव केला. तब्बल २ तास २९ मिनिटे रंगलेल्या या सामन्यात दोन्ही खेळाडूंमध्ये चुरशीची लढत पाहायला मिळाली.

या विजयासह अलेक्झांड्रोव्हाने जागतिक क्रमवारीतील नंबर वन खेळाडूविरुद्धची तिसरी विजयाची नोंद केली. याआधी तिने इगा स्वियातेकला मियामी २०२४ आणि सबालेन्काला दोहा २०२५ मध्ये पराभूत केले होते.

हा अलेक्झांड्रोव्हाचा डब्ल्यूटीए १००० स्पर्धेतील सहावा उपांत्यपूर्व फेरीतील प्रवेश आहे. दोहा २०२५ नंतर प्रथमच तिने या टप्प्यात धडक मारली आहे.

पहिल्या सेटमध्ये दोन्ही खेळाडूंनी एकमेकींची सर्व्हिस तीन-तीन वेळा मोडली. त्यामुळे सेट टायब्रेकमध्ये गेला आणि अलेक्झांड्रोव्हाने ७-३ असा टायब्रेक जिंकत आघाडी घेतली.

दुसऱ्या सेटमध्ये सबालेन्काने मिळालेल्या एकमेव ब्रेक पॉइंटचा फायदा उठवला आणि ६-४ असा सेट जिंकत सामना बरोबरीत आणला.

तिसऱ्या सेटमध्ये पुन्हा एकदा दोघींमध्ये जबरदस्त संघर्ष झाला. अलेक्झांड्रोव्हाने निर्णायक क्षणी बाजी मारली. ५-४ अशी आघाडी असताना सबालेन्कावर सामना वाचवण्याची जबाबदारी होती. तिने दोन ब्रेक पॉइंट आणि दोन मॅच पॉइंट वाचवले; मात्र तिसऱ्या मॅच पॉइंटवर अलेक्झांड्रोव्हाने सामना खिशात घातला.

दरम्यान, एलिना स्वितोलिनाने अमांडा अनिसिमोव्हाचा ६-२, ६-४ असा सरळ सेटमध्ये पराभव करत उपांत्यपूर्व फेरी गाठली.

यापूर्वी डायना श्नायडरने जेसिका पेगुलाला ६-३, ६-३ असे सरळ सेटमध्ये हरवत मोठा धक्का दिला होता.

तर इगा स्वियातेकने मार्टा कोस्त्युकवर ३-६, ६-१, ६-२ अशी शानदार मात करत पहिल्या सेटमधील धक्क्यातून दमदार पुनरागमन केले.

पेगुला, सबालेन्का आणि मीरा आंद्रीव्हा स्पर्धेतून बाहेर पडल्यानंतर आता ड्रॉमधील टॉप-५ मानांकित खेळाडूंमध्ये केवळ एलेना रायबाकिना (क्रमांक २) आणि कोको गॉफ (क्रमांक ४) यांचे आव्हान कायम आहे.