पंतप्रधान नरेंद्र मोदी सध्या सिक्किम दौऱ्यावर असून मंगळवारी सकाळी त्यांनी गंगटोकमध्ये स्थानिक मुलांसोबत फुटबॉल खेळत खास वेळ घालवला. या क्षणांचे फोटो त्यांनी सोशल मीडियावर शेअर करत आनंद व्यक्त केला.
पंतप्रधानांनी 'एक्स'वर लिहिले, 'गंगटोकमधली ही सुंदर सकाळ… सिक्किममध्ये माझ्या नन्ह्या मित्रांसोबत फुटबॉल खेळण्याचा आनंद काही वेगळाच आहे.' आणखी एका पोस्टमध्ये त्यांनी या सत्राला 'जबरदस्त फुटबॉल सेशन' असे संबोधले.
शेअर केलेल्या छायाचित्रांमध्ये पंतप्रधान पूर्णपणे क्रीडावेशात दिसत असून ते मुलांसोबत खेळताना आणि संवाद साधताना दिसत आहेत.
दरम्यान, पंतप्रधान मोदी सोमवारी (२७ एप्रिल) संध्याकाळी गंगटोकमध्ये दाखल झाले. त्यांच्या दौऱ्यातील मंगळवारचा कार्यक्रम व्यस्त असून ते गंगटोकमधील ऑर्किडेरियमला भेट देणार आहेत. तसेच, पालजोर स्टेडियममध्ये सिक्किम राज्य स्थापनेच्या ५०व्या वर्षाच्या समारोप कार्यक्रमाला ते उपस्थित राहतील.
या कार्यक्रमात पंतप्रधान ४,००० कोटी रुपयांहून अधिक किमतीच्या विविध विकास प्रकल्पांचे उद्घाटन, लोकार्पण आणि भूमिपूजन करणार आहेत. हे प्रकल्प पायाभूत सुविधा, संपर्क, आरोग्य, शिक्षण, वीज, शहरी विकास, पर्यावरण, पर्यटन आणि कृषी अशा अनेक क्षेत्रांशी संबंधित आहेत.
तसेच, युवकांना प्रोत्साहन देण्यासाठी पाकयोंग जिल्ह्यातील रंगपो येथे इनडोअर क्रिकेट सुविधेचेही उद्घाटन ते करणार आहेत.
सिक्किमच्या राज्य स्थापनेच्या सुवर्णमहोत्सवी वर्षात होत असलेला हा दौरा राज्य आणि ईशान्य भारताच्या सर्वांगीण विकासासाठी सरकारची बांधिलकी अधोरेखित करणारा ठरत आहे.