'जनरेशन झेड'च्या आंदोलनातून प्रेरणा
नेताजी सुभाषचंद्र बोस यांचे नातू चंद्रकुमार बोस यांनी नव्या राजकीय पक्षाच्या स्थापनेची योजना जाहीर केली आहे. दिल्लीतील जंतर-मंतरवर नुकत्याच झालेल्या 'जनरेशन झेड'च्या नेतृत्वाखालील आंदोलनांपासून प्रेरणा घेत स्वतःचा राजकीय पक्ष स्थापन करण्याचा त्यांचा मानस आहे.
हा पक्ष तरुणांना केंद्रस्थानी ठेवून नेताजींच्या सर्वसमावेशक आणि धर्मनिरपेक्ष विचारधारेवर आधारित असेल, असे बोस यांनी सांगितले.
बोस यांच्या राजकीय प्रवासातील हे आणखी एक महत्त्वाचे वळण आहे. पश्चिम बंगाल विधानसभा निवडणुकीपूर्वी त्यांनी भाजप सोडून तृणमूल काँग्रेसमध्ये प्रवेश केला होता. भाजपमध्ये जाण्याचा निर्णय ही आपली 'चूक' असल्याचे त्यांनी म्हटले होते. मात्र, काही महिन्यांतच त्यांनी वैयक्तिक कारणांचा हवाला देत तृणमूल काँग्रेसचाही राजीनामा दिला. इंडिया टुडेशी बोलताना बोस यांनी देशातील राजकारण आणि विविध संस्थांमध्ये भ्रष्टाचार बोकाळल्याचा आरोप केला. शिक्षण, आरोग्य, पायाभूत सुविधा आणि उद्योग क्षेत्रातील भ्रष्टाचारामुळे तरुण विद्यमान व्यवस्थेवर नाराज आहेत, असे ते म्हणाले. तरुणांना आपल्या हक्कांसाठी लढण्यासाठी स्वतंत्र राजकीय व्यासपीठाची गरज असल्याचेही त्यांनी सांगितले.
चंद्रकुमार बोस २०१६ मध्ये भाजपमध्ये दाखल झाले होते. सुमारे सात वर्षे पक्षात काम केल्यानंतर त्यांनी २०२३ मध्ये भाजप सोडला. नेताजींच्या विचारांचा प्रचार करण्यासाठी भाजपमध्ये 'आझाद हिंद मोर्चा' स्थापन करण्याचे आश्वासन आपल्याला देण्यात आले होते. मात्र, सात वर्षे प्रतीक्षा करूनही हे व्यासपीठ स्थापन झाले नसल्याचा दावा त्यांनी केला. भाजप सोडल्यानंतर २०२६च्या पश्चिम बंगाल विधानसभा निवडणुकीपूर्वी त्यांनी तृणमूल काँग्रेसमध्ये प्रवेश केला. नेताजींच्या विचारधारेच्या प्रचारासाठी काम करण्याची संधी मिळेल, असे त्यांनी त्यावेळी सांगितले होते. मात्र, त्यानंतर वैयक्तिक कारणांचा हवाला देत त्यांनी टीएमसीचाही राजीनामा दिला.
पान मसाल्याची 'प्लास्टिक पुडी' आता बंद! कागद, टिन, काचेचा वापर अनिवार्य
राहुल गांधींच्या त्या विदेश दौऱ्यात कोण होते सोबत ? फोटो केला व्हायरल
चित्रपट चालो न चालो, पॉपकॉर्नची कमाई मात्र जोरात
काँगोमध्ये इबोलाचा कहर; मृतांचा आकडा २ हजारांपार
प्रस्तावित आझाद हिंद पार्टीमध्ये पुरोगामी, सर्वसमावेशक आणि धर्मनिरपेक्ष विचारांशी सहमत असलेल्या तरुणांना जोडण्याचा प्रयत्न केला जाणार आहे. नेताजी सुभाषचंद्र बोस यांच्या विचारधारेच्या आधारे राष्ट्रनिर्माणात योगदान देणे हा पक्षाचा उद्देश असेल, असे चंद्रकुमार बोस यांनी स्पष्ट केले. दरम्यान, पक्षाची स्थापना अद्याप झालेली नसून ती करण्याची योजना बोस यांनी जाहीर केली आहे. 'जनरेशन झेड'च्या आंदोलनातून निर्माण झालेला तरुणांचा असंतोष आणि नेताजींच्या विचारांचा वारसा यांना एकत्र आणून स्वतंत्र राजकीय व्यासपीठ उभारण्याचा त्यांचा प्रयत्न आता प्रत्यक्षात कितपत येतो, हे आगामी काळात स्पष्ट होणार आहे.