बांग्लादेश आणि पाकिस्तान यांच्यात सुरू असलेल्या दोन कसोटी सामन्यांच्या मालिकेतील पहिल्या कसोटीच्या पाचव्या दिवशी पाकिस्तानचा डावखुरा फिरकीपटू नोमान अली याने ऐतिहासिक कामगिरी केली.

कसोटी क्रिकेटमध्ये १०० विकेट्स पूर्ण करणारा तो सर्वात वयोवृद्ध गोलंदाज ठरला आहे.

नोमान अलीने या डावात ३ विकेट्स घेतल्या. त्याने मेहदी हसन मिराजचा बळी घेताच त्याच्या कसोटी कारकिर्दीतील १०० विकेट्स पूर्ण झाल्या. नोमानने ३९ वर्षे २१७ दिवसांच्या वयात हा टप्पा गाठला. याआधी हा विक्रम इंग्लंडच्या बॉबी पील यांच्या नावावर होता. बॉबी पील यांनी १८९६ मध्ये ३९ वर्षे १८० दिवसांच्या वयात १०० विकेट्स पूर्ण केल्या होत्या.

कसोटी क्रिकेटमध्ये उशिरा १०० विकेट्सचा टप्पा गाठणाऱ्या गोलंदाजांमध्ये इंग्लंडचे रे इलिंगवर्थ (३९ वर्षे ३० दिवस), ऑस्ट्रेलियाचे क्लॅरी ग्रिमेट (३९ वर्षे २२ दिवस) आणि इंग्लंडचे सिडनी बार्न्स (३८ वर्षे ३१० दिवस) यांचाही समावेश आहे.

नोमान अली पाकिस्तानकडून सर्वात जलद १०० कसोटी विकेट्स घेणाऱ्या गोलंदाजांच्या यादीत संयुक्त चौथ्या स्थानावर पोहोचला आहे. त्याने २२ कसोटी सामन्यांत ही कामगिरी केली. फजल महमूद यांनीही २२ सामन्यांत १०० विकेट्स पूर्ण केल्या होत्या.

पाकिस्तानकडून सर्वात वेगाने १०० कसोटी विकेट्स घेण्याचा विक्रम यासिर शाहच्या नावावर आहे. त्याने फक्त १७ सामन्यांत हा टप्पा पार केला होता. सईद अजमल १९ सामन्यांत दुसऱ्या तर वकार युनूस २० सामन्यांत तिसऱ्या स्थानावर आहेत.