१४ हजार डीलर्सचा पाक सरकारला अल्टिमेटम
पाकिस्तानात इंधन टंचाईचे संकट निर्माण होण्याची शक्यता आहे. पेट्रोलियम डीलर्स असोसिएशनने १५ ऑगस्टपासून देशभरातील पेट्रोल पंप अनिश्चित काळासाठी बंद ठेवण्याचा इशारा दिला आहे.
आपल्या मागण्या मान्य करण्यासाठी संघटनेने सरकारला ७२ तासांचा अल्टिमेटम दिला असून, तोपर्यंत तोडगा न निघाल्यास शनिवार, १५ ऑगस्ट रोजी सकाळी ६ वाजल्यापासून पंप बंद करण्याची घोषणा करण्यात आली आहे.
पाकिस्तान पेट्रोलियम डीलर्स असोसिएशनचे अध्यक्ष मलिक खुदा बख्श यांनी मंगळवारी पत्रकार परिषदेत ही घोषणा केली. देशभरातील डीलर्सच्या बैठकीनंतर हा निर्णय घेण्यात आल्याचे त्यांनी सांगितले. पेट्रोलच्या किरकोळ विक्रीवरील डीलर्सचा मार्जिन ८ टक्के करण्याची प्रमुख मागणी आहे. सरकारने दिलेल्या आश्वासनांची पूर्तता न झाल्याने डीलर्समध्ये नाराजी वाढली असून, आपल्या सुमारे १४ हजार सदस्यांचा दबाव असल्याचे संघटनेने म्हटले आहे.
डीलर्सच्या म्हणण्यानुसार, त्यांच्या मागण्यांवर निर्णय घेण्यासाठी सरकारला यापूर्वी दोन आठवड्यांची मुदत देण्यात आली होती. मात्र, ही मुदत संपूनही ठोस निर्णय झालेला नाही. त्यामुळे आता सरकारला अंतिम ७२ तासांचा अल्टिमेटम देण्यात आला आहे. मागण्या मान्य न झाल्यास पेट्रोल पंप पुन्हा सुरू करण्याची कोणतीही तारीख निश्चित केलेली नाही, असे संघटनेने स्पष्ट केले आहे.
पेट्रोल पंप बंद करण्याच्या निर्णयाच्या पार्श्वभूमीवर पाकिस्तानातील मालवाहतूकदारांचा देशव्यापी संपही सुरू आहे. सरकार आणि मालवाहतूकदारांमध्ये झालेल्या चर्चेत तोडगा न निघाल्याने संप कायम ठेवण्याची घोषणा करण्यात आली आहे. त्यामुळे पेट्रोलियम डीलर्सच्या संभाव्य संपामुळे देशातील इंधन पुरवठा आणि वाहतूक व्यवस्थेवर अतिरिक्त दबाव निर्माण होण्याची शक्यता आहे.
विलेपार्ल्यात ११व्या मजल्यावरील दोन फ्लॅटला भीषण आग; चिमुकल्यासह दोघांचा मृत्यू
बँक लॉकर उघडला अन् धक्काच बसला; ५० लाखांचे दागिने गायब
घाटकोपरमध्ये घरांवर दरड कोसळून दोघांचा मृत्यू
इंदिरा कँटीनच्या स्वयंपाकघरासह गोदामात अस्वच्छता; गोदाम सील, नमुने तपासणीला
दरम्यान, यापूर्वीही पेट्रोल पंप मालकांनी देशव्यापी बंदची हाक दिली होती. २२ जुलै रोजी झालेल्या चर्चेनंतर एका संघटनेने प्रस्तावित बंद दोन आठवड्यांसाठी पुढे ढकलला होता. मात्र, मागण्यांवर अपेक्षित प्रगती न झाल्याने आता पुन्हा आंदोलनाचा इशारा देण्यात आला आहे. पेट्रोलियम डीलर्सच्या मागण्यांवर सरकारने तातडीने निर्णय न घेतल्यास १५ ऑगस्टपासून पाकिस्तानातील इंधन विक्रीवर मोठा परिणाम होण्याची शक्यता आहे. त्यामुळे पेट्रोल-डिझेलच्या पुरवठ्यावर तसेच सर्वसामान्यांच्या दैनंदिन प्रवासावर याचा थेट परिणाम होऊ शकतो.