तपास करण्यासाठी गुन्हा दाखल
निवडणुकीच्या तोंडावर पश्चिम बंगालमध्ये ७९ कच्चे बॉम्ब (क्रूड बॉम्ब) सापडल्याप्रकरणी राष्ट्रीय तपास संस्थेने (NIA) तपास सुरू केला आहे. पश्चिम बंगालमधील दक्षिण २४ परगणा जिल्ह्यातील भांगर येथे ७९ क्रूड बॉम्ब आणि इतर आक्षेपार्ह साहित्य सापडल्याप्रकरणी संस्थेने गुन्हा दाखल केला आहे.
केंद्र सरकारने शनिवारी (२५ एप्रिल) या प्रकरणाची एनआयए चौकशी करण्याचे आदेश दिल्यानंतर ही घडामोड समोर आली आहे.
'केंद्र सरकारच्या मते, प्रस्तुत प्रकरणात राष्ट्रीय तपास संस्था अधिनियम, २००८ अंतर्गत अनुसूचित गुन्हा घडला असून, सदर प्रकरण नागरिकांचे प्राण आणि मालमत्ता धोक्यात आणण्याच्या उद्देशाने स्फोटके आणि कच्चे बॉम्ब यांचा अवैध साठा आणि हाताळणी करण्याशी संबंधित आहे, ज्यायोगे लोकांच्या मनात भीती आणि दहशत निर्माण करण्याचा हेतू होता,' असे केंद्राच्या आदेशात म्हटले आहे.
केंद्रीय गृह मंत्रालयाच्या निर्देशानंतर ही कारवाई झाल्याची पुष्टी एनआयएच्या प्रवक्त्याने केली. या घटनेसंदर्भात मूळ गुन्हा कोलकाता येथील भांगर विभागातील उत्तर काशी पोलीस ठाण्यात नोंदवण्यात आला होता. शनिवारी पोईलेपारा येथील दफनभूमीजवळच्या एका बेवारस घरावर उत्तर काशीपूर पोलीस ठाण्याच्या पथकाने टाकलेल्या छाप्यात हे कच्चे बॉम्ब सापडले. पोलिसांच्या पथकाला 'तागाच्या दोऱ्यांनी बांधलेल्या, कच्च्या बॉम्बसारख्या दिसणाऱ्या ७९ गोल आकाराच्या वस्तू आणि इतर आक्षेपार्ह साहित्य' सापडल्या.
लष्करी उपग्रहांसाठी खासगी सहभाग गरजेचा
आत्मनिर्भर भारताला बुस्ट! बुलेट ट्रेनचे कोच देशातच होणार विकसित
न्या. स्वर्णकांता शर्मांच्या न्यायालयात मी जाणार नाही!
मरीन ड्राईव्ह परिसरात दुचाकींची धडक; तिघांचा मृत्यू
रविवारी, निवडणूक आयोगाने पश्चिम बंगाल पोलिसांना राज्यात कच्च्या बॉम्बच्या अवैध निर्मितीमध्ये सहभागी असलेल्यांना पकडण्यासाठी विशेष मोहीम सुरू करण्याचे निर्देश दिले होते. या प्रकरणात अद्याप कोणालाही अटक करण्यात आलेली नाही.
दरम्यान, वेगळ्या घटनेत भांगरमधील चालताबेरियाच्या पश्चिम बामुनिया गावात कच्चे बॉम्ब तयार करत असताना झालेल्या स्फोटाप्रकरणी पोलिसांनी वाहिदुल इस्लाम मोल्ला याला अटक केली आहे. शनिवारी चक मोरिचा तेतुतला घाट परिसरात रहिवाशांनी त्याला पाहिल्यानंतर पोलिसांच्या ताब्यात देण्यात आले. अशा घटनांमध्ये सामील असलेल्या एका मोठ्या नेटवर्कच्या सहभागाची एनआयए चौकशी करत आहे.