या विजयासह फर्नांडीजने स्पर्धेच्या अंतिम १६ खेळाडूंमध्ये स्थान मिळवले असून आता तिची गाठ जपानच्या माजी यूएस ओपन विजेत्या नाओमी ओसाकाशी पडणार आहे.

३०व्या मानांकित फर्नांडीजने पाचव्या मानांकित आंद्रीव्हाचा ६-१, ६-४ असा सरळ सेटमध्ये पराभव केला. हा सामना १ तास २१ मिनिटे चालला. या विजयासह टॉप-१० खेळाडूंविरुद्ध फर्नांडीजचा सलग ७ पराभवांचा सिलसिलाही संपुष्टात आला.

फर्नांडीजने पहिल्या सेटमध्ये सुरुवातीपासूनच आक्रमक खेळ करत आंद्रीव्हाला कोणतीही संधी दिली नाही. दुसरा सेटही तिने ५-१ अशी आघाडी घेत आपल्या नियंत्रणात ठेवला होता. मात्र, २० वर्षीय आंद्रीव्हाने त्यानंतर जोरदार पुनरागमन करत सलग गेम जिंकले आणि स्कोअर ५-४ असा केला.

मात्र, निर्णायक क्षणी फर्नांडीजने संयम राखला. ५-४ अशा स्कोअरवर स्वतःच्या सर्व्हिसवर खेळताना तिने महत्त्वाचे गुण जिंकले आणि सामना खिशात घातला.

या विजयामुळे कॅनेडियन ओपनमध्ये फर्नांडीजने अंतिम १६ मध्ये पोहोचण्याची कामगिरी पुन्हा एकदा केली आहे. यापूर्वी तिने २०२३ मध्ये मॉन्ट्रियलमध्ये अशीच कामगिरी केली होती.

विशेष म्हणजे, गेल्या वर्षी मुबाडाला डीसी ओपनमध्ये तिने जागतिक क्रमवारीतील चौथ्या क्रमांकाची खेळाडू जेसिका पेगुलाला पराभूत केले होते. त्यामुळे एक वर्षाहून अधिक काळानंतर टॉप-१० खेळाडूविरुद्ध फर्नांडीजचा हा पहिला विजय ठरला.

आंद्रीव्हाच्या खराब खेळाचाही तिला फायदा झाला. आंद्रीव्हाने संपूर्ण सामन्यात तब्बल ३४ अनफोर्स्ड एरर्स केल्या, तर तिच्या खात्यात केवळ १७ विनर्स होते. फर्नांडीजने मात्र संयमी आणि अचूक खेळ करत ८ विनर्स आणि केवळ ७ अनफोर्स्ड एरर्स केल्या.

आता अंतिम १६ मध्ये फर्नांडीजसमोर ११वी मानांकित नाओमी ओसाकाचे आव्हान असेल. ओसाकाने बेल्जियमच्या २०व्या मानांकित एलिस मर्टेन्सचा ६-१, ६-४ असा पराभव करत पुढील फेरी गाठली आहे.

फर्नांडीजने विजयानंतर सांगितले की, सकारात्मक राहणे, संयम राखणे आणि आपल्या क्षमतेवर विश्वास ठेवणे या गोष्टी विजयासाठी महत्त्वाच्या ठरल्या. त्यामुळे आता फर्नांडीज विरुद्ध ओसाका या सामन्याकडे टेनिस चाहत्यांचे लक्ष लागले आहे.