अमेरिकन डॉलर मजबूत झाल्याने तसेच बाँडवरील परतावा वाढल्याने सोन्या-चांदीच्या किमतीवर दबाव आला. याशिवाय गेल्या काही दिवसांतील तेजीमुळे गुंतवणूकदारांनी नफा वसुली केल्याचाही परिणाम दरांवर दिसून आला. एमसीएक्सवर सोन्याचा ऑक्टोबर वायदा ०.५१ टक्क्यांनी घसरून सुमारे १ लाख ५४ हजार रुपये प्रति १० ग्रॅमवर आला. तर चांदीच्या वायदा दरात ०.७० टक्क्यांची घट झाली असून भाव सुमारे २ लाख ४० हजार रुपये प्रति किलो पातळीवर पोहोचला. आंतरराष्ट्रीय बाजारातही सोन्याच्या फ्युचर्समध्ये ०.३० टक्क्यांची घसरण झाली आणि दर ४,५१३.७६ डॉलर प्रति औंसवर आले.

सोन्या-चांदीच्या दरातील या घसरणीमागे अमेरिकेतील आर्थिक घडामोडी महत्त्वाच्या ठरत आहेत. मागील सत्रातील ९८.९१ वरून डॉलर इंडेक्स ९९.०२ वर पोहोचला आहे. त्याचवेळी अमेरिकेच्या दहा वर्षांच्या सरकारी बाँडवरील यील्ड वाढून ४.७७ टक्के झाली. डॉलर मजबूत झाल्यास इतर चलनांमध्ये सोने खरेदी करणाऱ्यांसाठी ते महाग होते. तसेच बाँडवरील परतावा वाढल्यामुळे व्याज मिळत नसलेल्या सोन्यापेक्षा गुंतवणूकदारांचा कल इतर पर्यायांकडे वाढू शकतो. त्यामुळे सध्या मौल्यवान धातूंवर दबाव निर्माण झाला आहे. दरम्यान, अमेरिकेच्या फेडरल रिझर्व्हच्या आगामी निर्णयाकडेही बाजाराचे लक्ष आहे. १५ आणि १६ सप्टेंबरला होणाऱ्या बैठकीत व्याजदरांबाबत काय निर्णय घेतला जातो, यावर सोन्याच्या पुढील हालचाली मोठ्या प्रमाणात अवलंबून राहू शकतात.

फुकेट-दिल्ली एअर इंडियाच्या पायलटची ड्रग्ज चाचणी 'नॉन-नेगेटिव्ह'

दरम्यान, अमेरिकेतील नॉन-फार्म पेरोल्स आणि बेरोजगारीची आकडेवारी जाहीर होणार असल्याने गुंतवणूकदारांचे लक्ष त्याकडे लागले आहे. या आकडेवारीतून अमेरिकेच्या अर्थव्यवस्थेची स्थिती आणि फेडरल रिझर्व्हच्या पुढील व्याजदर धोरणाबाबत संकेत मिळू शकतात. बाजारातील अंदाजानुसार सप्टेंबरअखेर व्याजदर वाढीची शक्यता सुमारे ५० टक्के मानली जात आहे. दुसरीकडे अमेरिका-इराण संघर्ष आणि अमेरिकेच्या वाढत्या सरकारी कर्जामुळे महागाईची चिंता कायम आहे. त्यामुळे बाँड यील्डमध्येही चढ-उतार सुरू आहेत. अशा परिस्थितीत सणासुदीच्या काळात सोन्या-चांदीच्या दरात पुढील काही दिवस अस्थिरता कायम राहण्याची शक्यता आहे. त्यामुळे खरेदीदारांसाठी सध्याची घसरण दिलासादायक असली तरी दर आणखी खाली येतात का किंवा पुन्हा तेजी पकडतात का, याकडे लक्ष ठेवणे महत्त्वाचे ठरणार आहे.