आयसीसीच्या ताज्या महिला टी२० आंतरराष्ट्रीय रँकिंगमध्ये भारतीय फलंदाज शेफाली वर्माने दमदार कामगिरीच्या जोरावर दोन स्थानांची झेप घेत सहाव्या क्रमांकावर मजल मारली आहे. साउथ आफ्रिकेविरुद्ध सुरू असलेल्या मालिकेत तिच्या आक्रमक फलंदाजीचा तिला मोठा फायदा झाला आहे.
दुसऱ्या टी२० सामन्यात शेफालीने ३८ चेंडूत ५७ धावांची तुफानी खेळी साकारली. दोन सामन्यांत तिने १५६ च्या स्ट्राइक रेटने ९१ धावा करत आपला जबरदस्त फॉर्म दाखवला आहे. भारताची स्टार फलंदाज स्मृती मंधाना चौथ्या स्थानावर कायम आहे.
भारतीय संघाची कर्णधार हरमनप्रीत कौरलाही दोन स्थानांचा फायदा झाला असून ती आता अकराव्या क्रमांकावर पोहोचली आहे. पहिल्या टी२० मध्ये हरमनप्रीतने ४७ धावांची प्रभावी खेळी करत पुनरागमनाची झलक दिली.
हेही वाचा :
सोनं-चांदी दरात मोठी घसरण; जागतिक दबावामुळे बाजार अस्थिर
शेअर बाजारात जोरदार उसळी; सेन्सेक्स ७५३ अंकांनी वधारला
भारतीय ऍथलेटिक्सवर 'अत्यंत उच्च डोपिंग जोखीम'चा ठपका
जर्मनीतील गुरुद्वारात संघर्ष; शस्त्रांसह ४० जण भिडले
दरम्यान, साउथ आफ्रिकेची कर्णधार लौरा वोल्वार्ट पाचव्या स्थानावर कायम आहे. एनेरी डर्कसेनने अठरा स्थानांची झेप घेत तेहतीसावा क्रमांक गाठला, तर सुने लुस पस्तीसाव्या स्थानावर पोहोचली आहे.
गोलंदाजांच्या रँकिंगमध्ये पाकिस्तानची सादिया इकबाल अव्वल स्थानावर कायम आहे. साउथ आफ्रिकेची नॉनकुलुलेको म्लाबा पाच स्थानांनी पुढे जात सहाव्या क्रमांकावर, तर भारताची श्री चरणी चार स्थानांची झेप घेत तेवीसाव्या क्रमांकावर पोहोचली आहे.
ऑलराउंडर्समध्ये न्यूझीलंडची मेलि केर अव्वल स्थानावर कायम असून साउथ आफ्रिकेची क्लो ट्रायोन अकराव्या स्थानावर पोहोचली आहे.
बांग्लादेश-श्रीलंका मालिकेनंतर वनडे रँकिंगमध्येही बदल झाले असून शर्मिन अख्तर बावीसाव्या, तर सोभना मोस्टरी पन्नासाव्या क्रमांकावर पोहोचल्या आहेत. गोलंदाजांमध्ये नाहिदा अख्तर, राबेया खान आणि मारुफा अख्तर यांनाही फायदा झाला आहे.