सुरक्षित गुंतवणूक म्हणून सोन्याची मागणी वाढल्याने २५ ऑगस्ट रोजी सोन्याच्या दरात पुन्हा तेजी पाहायला मिळाली. दुसरीकडे, चांदीच्या दरात मात्र काहीशी नरमाई दिसून आली. त्यामुळे मौल्यवान धातूंच्या बाजारात सध्या संमिश्र वातावरण आहे.

एमसीएक्सवर ऑक्टोबर वायदा सोन्याचा भाव सकाळच्या व्यवहारात सुमारे १ लाख ६३ हजार रुपयांच्या आसपास पोहोचला. जागतिक बाजारातही सोन्याचा भाव मे महिन्यानंतरच्या सर्वोच्च पातळीच्या जवळ पोहोचला आहे. अमेरिकेतील आर्थिक घडामोडी, व्याजदर कपातीच्या शक्यता आणि वाढता भू-राजकीय तणाव यामुळे गुंतवणूकदारांचा सोन्याकडे कल वाढत आहे. अस्थिर परिस्थितीत सुरक्षित मालमत्ता म्हणून सोन्याला प्राधान्य दिले जात असल्याने त्याच्या दराला आधार मिळत आहे.

इराणी रियालची ऐतिहासिक घसरण; १ डॉलरच्या बदल्यात १३.७४ लाख रियाल

परीक्षेच्या मागण्यांवरून पाटण्यात विद्यार्थी रस्त्यावर

आरबीआयच्या योजनेला मोठा प्रतिसाद; ७२.८५ अब्ज डॉलर भारतात

अमेरिका आणि इराण यांच्यातील तणाव हा सध्या बाजारासाठी महत्त्वाचा घटक ठरला आहे. अमेरिकेकडून इराणवर आणखी निर्बंध लादण्यात आल्याने जागतिक अर्थव्यवस्थेवर त्याचे संभाव्य परिणाम काय असतील, याकडे गुंतवणूकदारांचे लक्ष लागले आहे. या पार्श्वभूमीवर तेलाच्या किमती, डॉलरची दिशा आणि अमेरिकेच्या व्याजदर धोरणात होणारे बदल यांचा सोन्याच्या भावावर परिणाम होण्याची शक्यता आहे.

दरम्यान, चांदीच्या दरात सोन्याच्या तुलनेत दबाव दिसून आला. एमसीएक्सवर सप्टेंबर वायदा चांदीचा भाव सुमारे २ लाख ४२ हजार रुपयांच्या आसपास होता. आंतरराष्ट्रीय बाजारातही चांदीच्या दरात काही प्रमाणात घसरण झाली. अलीकडील तेजीमुळे झालेल्या नफावसुलीचा परिणाम चांदीवर झाल्याचे मानले जात आहे.

आगामी काळात अमेरिकेतील महागाईची आकडेवारी, फेडरल रिझर्व्हचे व्याजदरासंदर्भातील संकेत आणि अमेरिका-इराण संबंध यावर सोन्या-चांदीच्या दरांची दिशा ठरणार आहे. तणाव वाढल्यास सोन्याला आणखी मागणी मिळू शकते, तर परिस्थिती निवळल्यास दरांवर दबाव येण्याची शक्यता आहे. त्यामुळे सणासुदीच्या काळात सोने खरेदी करणाऱ्या ग्राहकांसाठी आगामी काही दिवस महत्त्वाचे ठरणार आहेत.