न्यायालयाची परवानगी असतानाही आंदोलन
तमिळनाडूच्या मदुराई जिल्ह्यातील सुमारे ३०० वर्षे जुन्या हिंदू मंदिराच्या जीर्णोद्धारावरून वाद निर्माण झाला आहे. पेरैयूर तालुक्यातील थुम्मनायक्कनपट्टी गावात असलेल्या विनायगर आणि करुप्पन्नासामी मंदिराच्या नूतनीकरणाला स्थानिक मुस्लीम समुदायाकडून विरोध केला जात आहे.
दरम्यान, मद्रास उच्च न्यायालयाच्या मदुराई खंडपीठाने या जीर्णोद्धाराला परवानगी दिली आहे.
माहितीनुसार, हे मंदिर सुमारे २ एकर जमिनीवर वसलेले असून त्याचे व्यवस्थापन वंशपरंपरागत विश्वस्त तसेच तमिळनाडूच्या हिंदू धार्मिक आणि धर्मार्थ बंदोबस्ती विभाग (HR&CE) यांच्या माध्यमातून केले जाते. मंदिर व्यवस्थापनाने जीर्णोद्धारासाठी राज्य आणि जिल्हा स्तरावरील तज्ज्ञ समित्यांकडून आवश्यक परवानग्याही घेतल्या आहेत. मागील वर्षी सकुल हमीद नावाच्या व्यक्तीने मद्रास उच्च न्यायालयाच्या मदुराई खंडपीठात याचिका दाखल करून मंदिराच्या जीर्णोद्धाराला विरोध केला होता. या वर्षी जानेवारी महिन्यात न्यायालयाने सुनावणी केल्यानंतर मंदिराच्या नूतनीकरणाला परवानगी दिली. त्यानंतर आणखी एक याचिका दाखल करण्यात आली, ज्यामध्ये जीर्णोद्धाराच्या कामादरम्यान पोलिस संरक्षण देण्याची मागणी करण्यात आली होती. न्यायालयाने यावर पोलिसांना सुरक्षा पुरवण्याचे निर्देश दिले होते.
उच्च न्यायालयाच्या आदेशानंतर मंदिराचे वंशपरंपरागत विश्वस्त महेश्वरन आणि गावकऱ्यांनी मदुराईचे पोलिस अधीक्षक यांना एक निवेदन दिले. या निवेदनात मंदिराच्या जीर्णोद्धाराचे काम आणि कुंभाभिषेकम सोहळा पूर्ण होईपर्यंत पोलिस संरक्षण देण्याची विनंती करण्यात आली आहे.
गावकऱ्यांच्या म्हणण्यानुसार, मंदिराच्या जवळ सुमारे १०० वर्षांपूर्वी एका मशिदीचे बांधकाम झाले होते. त्यांचा आरोप आहे की मंदिराच्या जीर्णोद्धाराचे काम सुरू करण्याचा प्रयत्न होताच स्थानिक मुस्लीम मंदिर परिसरात जमा झाले आणि त्यांनी आंदोलन सुरू केले. आंदोलनकर्त्यांनी मंदिराचा जीर्णोद्धार करू नये आणि मंदिर दुसऱ्या ठिकाणी हलवावे अशी मागणी केली.
बनावट वैद्यकीय व्हिसावर दिल्लीत राहणाऱ्या १० बांगलादेशींना ठोकल्या बेड्या
मणिपूरमध्ये ओलीस ठेवलेल्या २१ नागा नागरिकांची सुटका
इराकमध्ये पाच क्रू मेंबर्ससह अमेरिकन लष्करी विमान कोसळले!
एआयच्या वाढत्या प्रभावाच्या पार्श्वभूमीवर अॅडोबचे सीईओ शांतनू नारायण पद सोडणार
माहितीनुसार, पोलिसांनी आंदोलन करणाऱ्या लोकांना समजावण्याचा प्रयत्न केला आणि न्यायालयाच्या आदेशाचा आदर करण्याचे आवाहन केले. मात्र परिस्थिती पूर्णपणे शांत झालेली नाही. विशेष म्हणजे, गावात हिंदूंची संख्या आता खूप कमी झाली असल्यामुळे मुस्लीम समुदायाकडून मंदिराच्या जीर्णोद्धाराच्या कामाला विरोध होत असल्याचे सांगितले जात आहे. या प्रकरणावर हिंदू तमिळर काचीचे नेते रामा रविकुमार यांनी प्रतिक्रिया देताना सांगितले की, मुस्लीम समुदायाने मंदिर परिसरात प्रवेश करून शतकांपूर्वीच्या विनायगर आणि करुप्पन्नासामी मंदिराच्या जीर्णोद्धाराविरोधात आंदोलन करणे धक्कादायक आहे. परिसरातील हिंदूंनी मंदिराच्या विकासासाठी जेव्हा जेव्हा प्रयत्न केले, तेव्हा मुस्लीम समुदायाने त्याला अडथळा आणला. मुस्लीम समुदायाचा दावा आहे की जवळ मशिद असल्यामुळे मंदिराचा जीर्णोद्धार करू नये. रामा रविकुमार यांनी असेही म्हटले की, परिसरात मुस्लीमांची संख्या अधिक असल्यामुळे हिंदूंच्या भावना दुखावणे योग्य नाही.