भारताचा युवा फलंदाज वैभव सूर्यवंशीने दुलीप ट्रॉफीत आणखी एक मोठा पराक्रम केला आहे. दुलीप ट्रॉफीच्या इतिहासात सर्वात कमी वयात अर्धशतक झळकावणारा फलंदाज बनत त्याने तब्बल ५७ वर्षे जुना विक्रम मोडला.
ईस्ट झोनकडून खेळताना वैभवने सेंट्रल झोनविरुद्धच्या पहिल्या उपांत्य सामन्यात अवघ्या ४२ चेंडूंमध्ये अर्धशतक पूर्ण केले. त्याने हे अर्धशतक १५ वर्षे १७५ दिवस वय असताना झळकावले. यापूर्वी हा विक्रम लक्ष्मण सिंह यांच्या नावावर होता. त्यांनी १९६९ मध्ये १६ वर्षे २३ दिवस वयात दुलीप ट्रॉफीत अर्धशतक केले होते.
भारताचा माजी लेगस्पिनर पीयूष चावला या यादीत तिसऱ्या क्रमांकावर आहे. त्याने १६ वर्षे ३०७ दिवस वयात दुलीप ट्रॉफीत अर्धशतक झळकावले होते.
वैभवने आपल्या आक्रमक खेळीत ७ चौकार आणि ७ षटकारांसह ९२ धावा केल्या. तो शतकापासून अवघ्या ८ धावांनी हुकला. हर्ष दुबेच्या गोलंदाजीवर मोठा फटका मारण्याच्या प्रयत्नात अरशद खानने सीमारेषेजवळ त्याचा झेल घेतला. बाद झाल्यानंतर शतक पूर्ण न झाल्याची निराशा वैभवच्या चेहऱ्यावर स्पष्ट दिसत होती.
वैभवने अभिमन्यू ईश्वरनसोबत पहिल्या विकेटसाठी १६१ धावांची दमदार भागीदारी केली. त्याच्या आक्रमक फलंदाजीमुळे ईस्ट झोनला सेंट्रल झोनच्या धावसंख्येच्या जवळ पोहोचण्यास मदत झाली.
दरम्यान, सामन्याच्या पहिल्या दिवशी वैभवने काही काळ ईस्ट झोनच्या कार्यवाहक कर्णधाराची जबाबदारीही सांभाळली. ईशान किशनच्या हाताला दुखापत झाल्याने त्याला मैदानाबाहेर जावे लागले. त्याच्या अनुपस्थितीत वैभवने नेतृत्वाची धुरा सांभाळली.
कार्यवाहक कर्णधार म्हणूनही वैभवने आपली छाप पाडली. मुकेश कुमारच्या गोलंदाजीवरील ४०व्या षटकात सेंट्रल झोनचा सलामीवीर आर्यन जुयाल याच्याविरुद्ध दिलेला नाबाद निर्णय त्याने डीआरएसच्या माध्यमातून आव्हान दिला आणि ईस्ट झोनला महत्त्वाचे यश मिळाले.
सेंट्रल झोनचा पहिला डाव २६६ धावांवर आटोपला. प्रत्युत्तरात ईस्ट झोनने टी-ब्रेकपर्यंत ८ बाद २६० धावा केल्या होत्या.
वैभव सूर्यवंशीने फलंदाजीसोबतच नेतृत्वातही आपली छाप पाडत दुलीप ट्रॉफीत नवा विक्रम आपल्या नावावर केला आहे.