भारत आणि श्रीलंका यांच्यात कोलंबोच्या सिंहली स्पोर्ट्स क्लब मैदानावर सुरू असलेल्या दुसऱ्या कसोटी सामन्यातील पहिल्याच दिवशी झालेल्या यशस्वी जायसवाल आणि असिथा फर्नांडो यांच्यातील वादाची आयसीसीने गंभीर दखल घेतली आहे.
मैदानावर झालेल्या या भिडंतीप्रकरणी दोन्ही खेळाडूंवर मॅच फीच्या २५ टक्के दंडाची कारवाई करण्यात आली आहे. तसेच त्यांच्या शिस्तभंगाच्या नोंदीत प्रत्येकी एक डिमेरिट पॉइंट जमा करण्यात आला आहे.
आयसीसी कोड ऑफ कंडक्टमधील कलम २.१२ अंतर्गत दोघांनाही दोषी ठरवण्यात आले. हे कलम सामना सुरू असताना खेळाडू, सपोर्ट स्टाफ, पंच, मॅच रेफरी किंवा अन्य व्यक्तीसोबत अनुचित शारीरिक संपर्क करण्याशी संबंधित आहे.
दुसऱ्या कसोटीच्या पहिल्या डावात असिथा फर्नांडोने यशस्वी जायसवालला ४५ धावांवर क्लीन बोल्ड केले. विकेट मिळाल्यानंतर असिथाने आक्रमक पद्धतीने सेलिब्रेशन करत यशस्वीला काहीतरी म्हटले. पॅव्हेलियनकडे परतत असलेला यशस्वी अचानक मागे वळला आणि असिथाच्या दिशेने गेला. यावेळी दोघांमध्ये शाब्दिक बाचाबाची झाली आणि यशस्वीच्या हेल्मेटचा असिथाला स्पर्श झाला.
परिस्थिती अधिक चिघळण्याची शक्यता दिसताच श्रीलंकेचा कर्णधार धनंजय डी सिल्वाने हस्तक्षेप करत यशस्वीला बाजूला केले.
दिवसाचा खेळ संपल्यानंतर यशस्वीच्या या कृतीवर टीकाही झाली. भारतीय संघाचे फलंदाजी प्रशिक्षक सितांशु कोटक यांनीही यशस्वीने असिथाच्या इतक्या जवळ जाणे टाळायला हवे होते, असे मान्य केले. मात्र, सामन्याच्या वातावरणात अशा प्रकारच्या शाब्दिक चकमकी घडत असतात, असेही त्यांनी स्पष्ट केले.
यशस्वीसाठी दुसरी कसोटीही अपेक्षेप्रमाणे राहिलेली नाही. चांगली सुरुवात करूनही तो ४५ धावांवर असिथाच्याच गोलंदाजीवर क्लीन बोल्ड झाला. पहिल्या कसोटीतही त्याची कामगिरी निराशाजनक होती. पहिल्या डावात त्याने ३२ धावा केल्या, तर दुसऱ्या डावात तो खाते न उघडताच बाद झाला.
दरम्यान, दुसऱ्या कसोटीच्या दुसऱ्या दिवशी टी-ब्रेकपर्यंत भारताने ८ गडी गमावत ४७५ धावा केल्या होत्या. ध्रुव जुरेलने शानदार फलंदाजी करत ९५ धावांवर नाबाद राहत भारताचा डाव सावरला आहे.
यशस्वी-असिथाच्या मैदानावरील आक्रमक वर्तनावर आयसीसीने थेट कारवाई केल्याने या प्रकरणाला आता शिस्तभंगाच्या कारवाईचे स्वरूप आले आहे. मैदानावरील आक्रमकता आणि खेळाडूवृत्ती यांच्यातील सीमारेषा ओलांडल्यास कोणालाही दंडाला सामोरे जावे लागेल, असा स्पष्ट संदेश या कारवाईतून मिळाला आहे.