गार्ड ऑफ ऑनर प्रदान

पंतप्रधान नरेंद्र मोदी शुक्रवारी (१५ मे) संयुक्त अरब अमिरातीची (UAE) राजधानी अबू धाबी येथे पोहोचले. याच ठिकाणाहून त्यांच्या पाच देशांच्या महत्त्वपूर्ण राजनैतिक दौऱ्याची सुरुवात झाली आहे.

पंतप्रधान मोदी १० मेपर्यंत संयुक्त अरब अमिराती, नेदरलँड्स, स्वीडन, नॉर्वे आणि इटली या देशांचा दौरा करणार आहेत. पश्चिम आशियातील वाढता तणाव आणि इराण युद्धाच्या पार्श्वभूमीवर होत असलेला हा दौरा भारताच्या ऊर्जा सुरक्षेसाठी आणि जागतिक धोरणात्मक भागीदारीच्या दृष्टीने अत्यंत महत्त्वाचा मानला जात आहे.

अबू धाबी येथे पोहोचल्यानंतर पंतप्रधान मोदींचे औपचारिक स्वागत करण्यात आले आणि त्यांना सेरेमोनियल गार्ड ऑफ ऑनर प्रदान करण्यात आला. याशिवाय युएईच्या हवाई हद्दीत प्रवेश केल्यानंतर संयुक्त अरब अमिरातीच्या हवाई दलातील F-16 लढाऊ विमानांनी पंतप्रधान मोदींच्या विमानाला एस्कॉर्ट केले. भारत- युएई संबंध अधिक मजबूत होत असल्याचा हा प्रतीकात्मक संदेश मानला जात आहे. पंतप्रधान मोदींचा युएई दौरा कालावधीने लहान असला, तरी त्याचे धोरणात्मक महत्त्व मोठे मानले जात आहे. पश्चिम आशियात सुरू असलेल्या तणावामुळे आणि तेलपुरवठ्याबाबत वाढत्या अनिश्चिततेमुळे जागतिक कच्च्या तेलाच्या किमतींमध्ये वाढ होत आहे. अशा परिस्थितीत भारतासाठी प्रमुख ऊर्जा भागीदार देशांसोबत समन्वय कायम ठेवणे अत्यंत महत्त्वाचे मानले जात आहे.

या दौऱ्यादरम्यान पंतप्रधान मोदी युएईचे राष्ट्राध्यक्ष मोहम्मद बिन झायेद नह्यान यांच्यासोबत द्विपक्षीय चर्चा करणार आहेत. या चर्चेत ऊर्जा सहकार्य, व्यापार, गुंतवणूक आणि प्रादेशिक सुरक्षा हे प्रमुख मुद्दे असतील. अधिकाऱ्यांच्या माहितीनुसार, भारतासाठी स्थिर ऊर्जा पुरवठा सुनिश्चित करणे हा चर्चेचा मुख्य केंद्रबिंदू असेल. युएई हा भारतासाठी कच्च्या तेलाचा प्रमुख पुरवठादार देश असून भारताला एलपीजी पुरवठा करणाऱ्या सर्वात मोठ्या देशांपैकी एक मानला जातो. त्यामुळे ऊर्जा बाजारातील अस्थिरतेच्या काळात ही बैठक भारतासाठी विशेष महत्त्वाची ठरत आहे.

युएई दौऱ्यानंतर पंतप्रधान मोदी नेदरलँड्स, स्वीडन, नॉर्वे आणि इटली या देशांना भेट देणार आहेत. भारताचे युरोप आणि नॉर्डिक देशांसोबतचे धोरणात्मक संबंध अधिक मजबूत करण्याच्या व्यापक राजनैतिक उपक्रमाचा हा भाग मानला जात आहे. या देशांसोबत होणाऱ्या बैठकींमध्ये व्यापार विस्तार, हरित तंत्रज्ञान, स्वच्छ ऊर्जा, नवोन्मेष आणि गुंतवणूक सहकार्यावर भर दिला जाणार आहे. पंतप्रधान मोदी इंडिया-नॉर्डिक शिखर परिषदेतही सहभागी होणार असून, त्यामध्ये शाश्वत विकास, उदयोन्मुख तंत्रज्ञान आणि आर्थिक भागीदारीवर चर्चा होण्याची शक्यता आहे.