भोकरदन येथील भिकन रोजेकर (वय २६) याने केंद्रीय लोकसेवा आयोगाच्या परीक्षेमध्ये 812वा रँक घेऊन अतिशय कष्टातून शिकवणाऱ्या आई-वडिलांचे स्वप्न पूर्ण केले आहे. या स्वप्नपूर्तीनंतर, भिकनच्या या यशामुळे तो राहत असलेल्या त्याच्या पत्र्याच्या शेडमधील घरात मोठा आनंद उत्सव पाहायला मिळत आहे. भिकनचे प्राथमिक शिक्षण हे गावातच झाले असून महाविद्यालयिन शिक्षण छत्रपती संभाजीनगर येथे झाले आहे.

घरच्या हालाखीच्या परिस्थितीमुळे एका एनजीओच्या माध्यमातून त्याने दिल्ली येथे राहून यूपीएससीचा अभ्यास केला. युपीएससीच्या परीक्षेत त्याला अनेकवेळा अपयश आले. मात्र, सहाव्या प्रयत्नात त्याने अखेर हे यश संपादन करत स्वत:ची आणि आई-वडिलांची स्वप्नपूर्ती केली. भिकनचे वडील जगन रोजेकर यांनी दुसऱ्याच्या शेतात राबून भिकनच्या शिक्षणाला पाठबळ दिले आहे.