जीव लई वर झाला का… रेस गाडी चालण्याचे लायसन्स मिळालं का? असा जाब विचारत महिला कॉन्स्टेबलने तीन युवतींची भर रस्त्यावर तुफान शाब्दीक धुलाई केली. वाहतूक शाखेच्या महिला कर्मचाऱ्यांचे नाव प्रणिता मुसणे आहे. युवती आणि नागरिकांच्या सुरक्षिततेसाठी त्यांनी युवतींना खडे बोल सुनवाल्याचे काही नेटिझन्सचे म्हणणे आहे तर त्यांचे हे वर्तन चुकीचे असल्याचेही काहीजण बोलत आहे.

लातूर शहरातील एका मुख्य रस्त्यावरुन तीन युवती स्कुटीवरुन बेफाम निघाल्या होत्या. कर्तव्यावर असलेल्या वाहतूक शाखेच्या महिला कॉन्स्टेबलला ही बाब लक्षात आली. त्यानंतर, बराच वेळ त्यांचा पाठलाग करून त्या तीन युवतींना पोलिसांकडून अडवण्यात आले. त्यानंतर वाहतूक शाखेतील महिला कर्मचाऱ्यांचा संताप अनावर झाला होता. त्या तीन युवती हाताला लागल्यानंतर महिला कॉन्स्टेबलने तिन्ही युवतींना भर रस्त्यावरच चापटांचा प्रसाद दिला.

गाडी कशी चालवता… कसं बसता… घरी सांगून आलात का… अपघात झाला, तुम्ही जर मेलात तर घरच्यांनी कोणाकडे पाहायचे… तुझ्या बापाचा नंबर दे, फोन लाव तुझ्या आईला… अशा अनेक प्रश्नांची सरबत्ती या महिला कॉन्स्टेबलने सुरू केली होती. त्यावर, आमचं चुकलं म्हणून त्या तीन युवती गयावया करत होत्या. मात्र, वाहतूक शाखेच्या महिला कर्मचाऱ्यांचा संताप काही केल्या कमी होत नव्हता. हा सर्व घटनाक्रम मोबाईल कॅमेऱ्यात कैद झाला आहे. सध्या हा व्हिडिओ सोशल मीडियावर तुफान व्हायरल झाला आहे.

दरम्यान, युवतींनी बेफाम गाडी चालवली हे जेवढं सत्य तेवढेच संतापलेल्या महिला कॉन्स्टेबल मुलींना भर रस्त्यावर मारहाण केली हे ही सत्य आहे. त्यामुळे, या घटनेवर आता दोन्ही बाजूंनी प्रतिक्रिया येत आहेत. कोण म्हणतं मुलींची चूक होती… त्यांना रस्त्यावर असं मारत अपमान करणे योग्य नव्हे, महिला कॉन्स्टेबलची चूक झाली, असेही काहींचे म्हणणे आहे. कोण म्हणत आहे की, महिला कॉन्स्टेबलचं बरोबर आहे. या चर्चा आणि तो व्हिडिओ आता सोशल मीडियावर व्हायरल होत असून दोन्ही बाजूंनी युक्तिवाद करणारे नेटीझन्स पाहायला मिळत आहेत.