पुणे: केतन अग्रवाल हत्या प्रकरणात आता अत्यंत खळबळजनक आणि धक्कादायक माहिती समोर आली आहे. केतन याची होणारी भावी पत्नी आणि या प्रकरणातील आरोप सिया गोयल ही आधीच विवाहित असल्याची धक्कादायक माहिती पोलिस तपासादरम्यान समोर आली आहे.
आरोपी सिया गोयल आणि तिचा प्रियकर चेतन चौधरी यांनी चार महिन्यांपूर्वीच घरच्यांपासून लपवून गुपचूप लग्न केले होते, असा खळबळजनक दावा पोलिसांनी केला आहे. दोघांच्या मोबाईलमधील व्हॉट्सॲप चॅटने या गुप्त विवाहाचं बिंग फोडलं असून, यामुळे या संपूर्ण हत्याकांडाला आता एक वेगळंच वळण मिळालं आहे. १८ जून रोजी लोहगडावरून ढकलून केतन अग्रवाल यांची हत्या करण्यात आली होती. याप्रकरणी पोलिसांनी सिया गोयल आणि चेतन चौधरी यांना अटक केली आहे. सुरुवातीला हे प्रकरण त्रिकोणी प्रेमाचं वाटत होतं, मात्र पोलिसांच्या हाती लागलेल्या डिजिटल पुराव्यांनी पोलिसांनाही चक्रावून सोडले आहे.
पोलिसांनी आरोपींच्या मोबाईलमधील कॉल रेकॉर्ड, लोकेशन, चॅट आणि इंटरनेट सर्च हिस्ट्रीची सखोल पडताळणी केली. गेल्या ६ ते ७ महिन्यांतील डिजिटल डेटा तपासत असताना, सिया आणि चेतनने चार महिन्यांपूर्वीच विवाह केल्याचे निष्पन्न झाले. घरच्यांच्या भीतीने त्यांनी हे लग्न लपवून ठेवलं होतं आणि त्यानंतरच केतनला रस्त्यातून हटवण्यासाठी हा क्रूर कट रचण्यात आल्याचा संशय बळावला आहे.
पोलिसांनी दिलेल्या माहितीनुसार, केतन अग्रवालचा खून करण्याचा पहिला प्रयत्न १४ जून रोजीच करण्यात आला होता. मात्र, त्या दिवशी प्रत्यक्ष कृती करताना सियाची हिंमत झाली नाही. ती कमालीची घाबरल्याने तो प्रयत्न फसला. यानंतर सियाने चेतनला चॅटवर म्हटलं, "माझं डेअरिंग होत नाहीये; तूही चल. आपण दोघे मिळून त्याला दरीत ढकलून देऊ." अखेर १८ जून रोजी दोघांनी मिळून केतनचा काटा काढला असल्याची माहिती पोलिसांनी दिली.