शिराज मुजावर सर हे कळे विद्यामंदिर कळे (ता.पन्हाळा) येथील सेवानिवृत्त चित्रकला शिक्षक होते.शिक्षक म्हणून त्यांनी हजारो विद्यार्थ्यांना कलेची प्रेरणा दिली. तर व्यंगचित्रकार म्हणून आपल्या प्रभावी रेखाटनांतून सामाजिक, आर्थिक,राजकीय, पर्यावरणीय आणि नागरी समस्यांवर अचूक भाष्य केले.

रस्त्यांच्या चौकाचौकात बसून त्यांनी काढलेल्या मार्मिक व्यंगचित्रांनी सामान्य नागरिकांचे प्रश्न प्रभावविपणे मांडले. त्यांच्या प्रदर्शनांना राज्यभरातून उत्सुर्फ प्रतिसाद लाभला. विविध दैनिक, साप्ताहिके,मासिके, दिवाळी अंक आणि प्रदर्शनांमधून त्यांची हजारो व्यंगचित्रे प्रकाशित झाली. दैनिक पुढारीच्या अंकुर पुरवणीच्या मुखपृष्ठावर तसेच पुरवणीत त्यांची व्यंगचित्रे नियमित प्रसिद्ध होत असत.

त्यांनी 'खट्याळ कुंचला', 'मिस्किल गुंडूराव', हसा…हसा…हसा ही व्यंगचित्रांची पुस्तके तसेच 'पूर्ण विराम' आणि संदर्भ हे कवितासंग्रह प्रकाशित केले. त्यांच्या चंपक या कथात्मक व्यंगचित्र मालिकेचे देशातील पाच भाषांमध्ये प्रकाशन झाले होते. चित्रकले सोबतच गायन, वादन, गीत-संगीत आणि साहित्याचीही त्यांना उत्तम जाण होती. त्यामुळे ते एक बहुआयामी कलावंत म्हणून ओळखले जात होते. हजारो आजी-माजी विद्यार्थी,सहकारी शिक्षक,शिक्षकेतर कर्मचारी तसेच राज्यभरातील असंख्य कलाप्रेमी असा मोठा परिवार आहे.

शिराज मुजावर सर यांच्या निधनाने केवळ एक व्यंगचित्रकार नव्हे तर समाजातील प्रश्नांवर कुंचल्यातून बोलणारा निर्भीड आवाज कायमचा हरपला आहे. विविध क्षेत्रातील मान्यवरांनी त्यांच्या निधनाबद्दल तीव्र दुःख व्यक्त करत भावपूर्ण श्रद्धांजली अर्पण केली आहे.