पोलिसांनी रात्रभरातच घेतले ताब्यात
सावंतवाडी : तालुक्यातील एका शासकीय - अनुदानित वसतिगृहातून काल रात्री उशिरा दरवाजा तोडून तीन मुली पळून गेल्याची धक्कादायक घटना शुक्रवारी रात्री समोर आली होती.
मात्र, सावंतवाडी पोलिसांनी तातडीने चक्रे फिरवत रात्रभर कसून शोधमोहीम राबवली आणि शनिवारी सकाळी या तीनही मुलींना सुरक्षितरीत्या ताब्यात घेतले. पोलिसांच्या या तत्परतेमुळे वसतिगृह प्रशासन आणि पालकांनी सुटकेचा श्वास सोडला आहे.
पोलिसांनी दिलेल्या प्राथमिक माहितीनुसार, काल रात्री उशिरा वसतिगृहाच्या अभिरक्षकांच्या ताब्यात असलेल्या तीन अल्पवयीन मुलींनी मुख्य दरवाजा तोडून वसतिगृहातून पळ काढला. नियमित तपासणी दरम्यान मुली बेपत्ता झाल्याचे व्यवस्थापनाच्या लक्षात आले. यामुळे वसतिगृह प्रशासनाची एकच धावपळ उडाली. घटनेचे गांभीर्य लक्षात घेऊन प्रशासनाने तातडीने स्थानिक पोलिसांशी संपर्क साधून घटनेची माहिती दिली.
एस.टी. स्टँड, रेल्वे स्टेशनवर नाकाबंदी अल्पवयीन मुली वसतिगृहातून पळाल्याची माहिती मिळताच पोलीस प्रशासनाने तात्काळ पावले उचलली. पोलीस ठाण्याचा संपूर्ण फौजफाटा रात्रीच शहरात व तालुक्यात ठिकठिकाणी रवाना करण्यात आला. मुली नेमक्या कुठे गेल्या असाव्यात, याचा सुगावा लावण्यासाठी पोलिसांनी एस.टी. बस स्थानके, रेल्वे स्टेशन, मुख्य चौक आणि शहराबाहेर जाणाऱ्या रस्त्यांवर कसून तपासणी सुरू केली. संशयित ठिकाणांची आणि वाहनांची रात्रभर झाडाझडती घेतली जात होती.
गोपनीय माहितीच्या आधारे सकाळी यश रात्रभर सुरू असलेल्या या व्यापक शोधमोहिमेला आज सकाळी यश आले. पोलिसांना मिळालेल्या एका गोपनीय माहितीच्या आधारे, सकाळी १० वाजताच्या सुमारास या तीनही अल्पवयीन मुलींचा शोध लागला. पोलिसांनी तात्काळ घटनास्थळी धाव घेत त्यांना सुरक्षितरीत्या ताब्यात घेतले.
पुढील तपास सुरू पळून गेलेल्या तीनही मुलींना पुढील आवश्यक त्या कायदेशीर प्रक्रिया आणि समुपदेशनासाठी (Counseling) पोलीस ठाण्यात आणण्यात आले आहे. अत्यंत संवेदनशील आणि सुरक्षित मानल्या जाणाऱ्या वसतिगृहाचा दरवाजा तोडून या मुलींनी नेमके कोणत्या कारणासाठी हे पाऊल उचलले? त्यांना यासाठी कोणी प्रवृत्त केले होते का? याचा सखोल तपास आता सावंतवाडी पोलीस करत आहेत.