चिपळूण: मुंबई-गोवा राष्ट्रीय महामार्गावर (Mumbai-Goa National Highway) भीषण अपघातांची मालिका सुरूच असून, बुधवारी पहाटे वालोपे परिसरात एका कारला भीषण अपघात झाला. मुंबईहून चिपळूणच्या दिशेने येणाऱ्या एका कारवरील चालकाचे नियंत्रण सुटल्याने ती थेट रस्त्याच्या कडेला असलेल्या खोल खड्ड्यात कोसळली.

या अत्यंत भीषण अपघातात कारमधील एका व्यक्तीचा जागीच मृत्यू झाला असून दोन निष्पाप लहान बालकांसह ५ जण गंभीर जखमी झाले आहेत.

पहाटे ४.२५ वाजता घडली दुर्घटना

प्राप्त माहितीनुसार, कार (क्रमांक एमएच ०८ बीई १७४२) ही मुंबईहून चिपळूणच्या दिशेने येत होती. बुधवारी पहाटे ४.२५ वाजण्याच्या सुमारास ही कार वालोपे येथील एचपी पेट्रोल पंपासमोर आली असता, चालकाचा कारवरील ताबा सुटला. वेग जास्त असल्याने कार रस्त्यालगत असलेल्या एका मोठ्या आणि खोल खड्ड्यात थेट जाऊन कोसळली. हा अपघात इतका भीषण होता की कारचा दर्शनी भागाचा चक्काचूर झाला.

मार्कंडी येथील संजय जाधव यांचा दुर्दैवी मृत्यू

या भीषण अपघातात कारमधील संजय जाधव (रा. मार्कंडी, चिपळूण) यांचा गंभीर दुखापत झाल्याने दुर्दैवी मृत्यू झाला. अपघातानंतर त्यांचा मृतदेह पुढील कायदेशीर व वैद्यकीय प्रक्रियेसाठी कामथे उपजिल्हा रुग्णालयात (Kamthe Sub-District Hospital) पाठवण्यात आला आहे.

दोन लहान मुलांसह पाच प्रवासी गंभीर जखमी

या अपघातामध्ये कारमधील इतर पाच जण गंभीर जखमी झाले आहेत, ज्यामध्ये दोन लहान चिमुरड्यांचाही समावेश आहे. जखमींची नावे खालीलप्रमाणे आहेत: १. अप्रीन सावंत (वय ४४, रा. मुंबई) २. रिधा मोडक (वय २८, रा. मुंबई) ३. रिया मुल्ला (वय ३६, रा. चिपळूण) ४. उजर मुल्ला (वय ९, रा. चिपळूण) ५. आईन मुल्ला (वय ४, रा. चिपळूण)

स्थानिक नागरिक आणि रुग्णवाहिकेची तत्परता

पहाटेच्या वेळी अपघाताचा मोठा आवाज होताच परिसरातील स्थानिक नागरिकांनी आणि पेट्रोल पंपावरील कर्मचाऱ्यांनी तात्काळ घटनास्थळी धाव घेतली. त्यांनी कारमध्ये अडकलेल्या जखमींना बाहेर काढत मदतकार्य सुरू केले.

घटनेची माहिती मिळताच 'जगद्‍गुरु रामानंदाचार्य नरेंद्राचार्यजी महाराज संस्थेची' आपत्कालीन रुग्णवाहिका तातडीने घटनास्थळी दाखल झाली. जवानांनी जखमींना प्राथमिक उपचार देऊन पुढील अतिदक्षतेच्या उपचारासाठी चिपळुणातील 'लाइफ केअर हॉस्पिटल'मध्ये दाखल केले. सध्या या सर्व जखमींवर डॉक्टरांच्या देखरेखीखाली उपचार सुरू आहेत.