टिळकनगर भागात ही घटना घडली असून, पोलिसांनी तात्काळ कारवाई करत तीन आरोपींना अटक केली आहे. या घटनेमुळे परिसरात संताप व्यक्त होत आहे.

मिळालेल्या माहितीनुसार, चेतन चव्हाण, हेमंत चव्हाण आणि उमेश वर्मा अशी अटक करण्यात आलेल्या आरोपींची नावे आहेत. तिघेही रिक्षा चालक असून, त्यापैकी दोन आरोपींची पीडित तरुणीशी आधीपासून ओळख होती. ओळखीचा फायदा घेत त्यांनी तरुणीला पार्टीसाठी बाहेर येण्यास सांगितले.

घटनेच्या दिवशी आरोपींनी तरुणीला पार्टीच्या बहाण्याने एका घरात नेले. तेथे तिला मद्यपान करायला दिले. त्यानंतर तरुणीची शुद्ध हरपल्यानंतर तिघांनी तिच्यावर आळीपाळीने अत्याचार केल्याचा आरोप आहे. हा प्रकार समजल्यानंतर तरुणीने धाडस दाखवत टिळकनगर पोलीस ठाण्यात जाऊन तक्रार नोंदवली.

तक्रार मिळताच पोलिसांनी तातडीने गुन्हा दाखल करून तपास सुरू केला. काही तासांतच पोलिसांनी तिन्ही आरोपींना अटक केली. सध्या या प्रकरणाचा अधिक तपास सुरू आहे.

या घटनेमुळे महिलांच्या सुरक्षेचा प्रश्न पुन्हा एकदा ऐरणीवर आला आहे. ओळखीचा गैरफायदा घेत अशा प्रकारे गुन्हे घडत असल्याने नागरिकांनी सावध राहण्याचे आवाहन केले जात आहे. आरोपींवर कठोर कारवाई करण्याची मागणीही नागरिकांकडून होत आहे.