07 : पुणे-सोलापूर राष्ट्रीय महामार्गावर धायगुडेवाडी (ता. दौंड) गावाच्या हद्दीत एका चारचाकी वाहनासह तब्बल 20 लाख 30 हजार रुपयांचा गांजा यवत पोलिसांनी जप्त केला आहे. या कारवाईत दोन आरोपींना अटक करण्यात आली आहे. ही कारवाई हॉटेल दुर्गा समोर मंगळवारी (ता. 31) रात्री सव्वा अकरा वाजण्याच्या सुमारास करण्यात आली.

शाकीर शब्बीर पानसरे (मूळ रा. तालमीसमोर, येवलेवाडी, ता. हवेली; सध्या रा. अहिल्यादेवी चौक, चोरमले बिल्डिंग, सुपे, ता. बारामती) व समाधान शिवाजी दाभाडे (रा. अंतुलेनगर, येवलेवाडी, ता. हवेली, पुणे) अशी अटक करण्यात आलेल्या दोघांची नावे आहेत. याप्रकरणी यवत पोलीस स्टेशनचे पोलीस हवालदार गुरुनाथ युवराज गायकवाड यांनी फिर्याद दिली आहे.

पोलिसांनी दिलेल्या माहितीनुसार, यवत पोलीस स्टेशनचे पोलीस हवालदार गुरुनाथ गायकवाड यांना गोपनीय बातमीदाराकडून माहिती मिळाली होती की, सोलापूर-पुणे महामार्गावरून एका पांढऱ्या रंगाच्या कारमधून मोठ्या प्रमाणात गांजाची वाहतूक केली जाणार आहे. या माहितीची खातरजमा केल्यानंतर पोलीस पथकाने मंगळवारी रात्री सव्वा अकरा वाजण्याच्या सुमारास धायगुडेवाडी येथील हॉटेल दुर्गा समोर सापळा रचला.

संशयास्पद मारुती सुझुकी बलेनो कारची झडती घेतली असता पोलिसांना खाकी रंगाच्या चिकटपट्टीने (सेलो टेप) बंद केलेली सहा वेगवेगळी पाकिटे आढळली. या पाकिटांची तपासणी केली असता त्यात अमली पदार्थ असलेला गांजा असल्याचे निष्पन्न झाले. यावेळी वजन केल्यावर सदर गांजा 29 किलो 700 ग्रॅम असल्याचे समोर आले. पोलिसांनी गुन्ह्यात वापरलेली 5 लाख 50 हजार रुपये किमतीची पांढऱ्या रंगाची मारुती सुझुकी बलेनो कार आणि गांजा असा एकूण 20 लाख 30 हजार रुपयांचा मुद्देमाल जप्त केला आहे.

याप्रकरणी दोन्ही आरोपींविरुद्ध यवत पोलीस ठाण्यात एनडीपीएस (NDPS) कायदा 1985 चे कलम 8(ब), 20(इ) तसेच बीएनएस 2023 चे कलम 3(5) अन्वये गुन्हा (रजि. नं. 291/2026) दाखल करण्यात आला आहे. पुढील तपास पोलीस सहायक पोलीस निरीक्षक महेश माने करीत आहेत.