'संवादांतल्यान संस्कृताय, धर्म, आचार-विचार प्रक्रियेन आकार घेतला'

"आमच्या जिवितांत गुरूच्या मार्गदर्शनाची सदांच गरज आसता आनी भारतीय संस्कृतायेंत गुरू-शिश्य संबंदाक मोलादीक म्हत्व आसा.

कारण गुरू आनी शिश्य हांचे मदीं प्रस्न आनी जापो आशिल्ल्या संवादांतल्यान- संस्कृताय, धर्म, आचार-विचार प्रक्रियेन आकार घेतला. त्या संदर्भांत श्री गुरू गीता ह्या मराठी अणकाराचें प्रकाशन जावप हि काळाची गरज आशिल्ली," अशें प. पू. श्री पद्माकर महाराज ट्रस्टाचे शिष्यगुरु सुब्राय काका हांणी सांगले.

बाळकृष्ण वसंत कामत हांणी मूळ संस्कृतांतल्यान मराठींत अणकारीत केल्ल्या श्री गुरू गीता पुस्तकाच्या विधीपुर्वक विमोचन सुवाळ्यांत ते उलयताले. हें पुस्तक प्रकाशन खांडेपार, फोंडे हांगा आशिल्ल्या प. पू. श्री पद्माकर महाराज मंदिराच्या प्राकारांत प. पू. सुब्राय काका हांच्या हातांतल्यान जालें. ह्यावेळार माचयेर
अणकारपी बाळकृष्ण वसंत कामत तशेंच पुस्तकाचो निर्मिती सहकारी आनी कवी-लेखक उदय म्हांबरो, आनी पटकथा लेखक, दिग्दर्शक आनी साहित्य अभ्यासक किशोर अर्जुन हाजीर आशिल्ले.

शिष्यगुरु सुब्राय काकान फुडें नदरेक हाडलें की संस्कृत भाशेंत असंख्य म्हत्वाचे ग्रंथ अस्तित्वांत आसले तरी आयज सगळ्यांक संस्कृताचे ज्ञान ना. ताका लागून पुस्तका भितर स्पश्ट केल्लो शिव आनी पार्वती हांचे मदलो दैवी संवाद समजून घेवपाची आतां भक्त वाचप्यांक एक उत्कृश्ट संद मेळ्ळ्या.:श्री गुरू गीता' देव शिव आनी पार्वती देवी हांचे मदल्या संवादाक समाविश्ट करपी संस्कृत ग्रंथ-अणकार आनी उजवाडावपाचो बाळकृष्ण कामत हाणें केल्लो उपक्रम हो तोखणायेचो वावर अशी तांणी टिप्पणी केली.

पुस्तकाचेर उलयतना किशोर अर्जुन हांणी म्हळें की, भारतीय बौध्दिक परंपरे भितर फकत आज्ञा वा प्रवचनांचो संच म्हणून गिन्यानाचो प्रसार केन्नाच जावंक ना; तर तो सदांच प्रस्न, जापो आनी संवादाच्या माध्यमांतल्यान समाजांत पावला. 'वादे वादे जायते तत्त्वबोध:' हे व्याख्येचो उल्लेख करून संवाद हो गिन्यानाचीच बुन्याद आसता अशें सांगलें. तरी समकालीन काळार संवादाचें हेंच सार आमी ल्हवू ल्हवू व्हगडावपाक लागल्यात अशें दिसता. आमचेर जावपी म्हायती, सल्लो आनी निर्देश हांच्या सतत हुंवारांत दुसऱ्याचें आयकपाची आनी समजून घेवपाची संवय ल्हवू ल्हवू उणी जाल्या अशेंय तांणी म्हळें.