एकेकाळी Ask Jeeves म्हणून ओळखले जाणारे Ask.com हे लोकप्रिय सर्च इंजिन जवळपास 30 वर्षांनंतर बंद करण्यात आले आहे. मिळालेल्या माहितीनुसार, Ask.com चे मालक असलेल्या IAC (InterActiveCorp) यांनी हा निर्णय घेतलेला आहे.

बदलत्या तंत्रज्ञानाच्या पार्श्वभूमीवर आणि वाढत्या स्पर्धेमुळे हा निर्णय घेण्यात आल्याचे सांगितले जाते.
Ask.com हे 1996 साली सुरू झाले होते आणि वापरकर्त्यांना प्रश्न विचारून उत्तरे मिळवण्याची सुविधा देणारे हे एक वेगळे सर्च इंजिन होते. त्या काळात त्याची मोठी लोकप्रियता होती. मात्र, काळानुरूप Google, Yahoo आणि Microsoft (Bing) सारख्या मोठ्या कंपन्यांशी स्पर्धा करताना Ask.com मात्र मागे पडले.

जवळपास 30 वर्षांनंतर या प्लॅटफॉर्मने 1 मे 2026 ला आपले कामकाज पूर्णपणे बंद केले आहे. ही माहिती कंपनीच्या वेबसाइटवरच जारी केलेल्या सूचनेद्वारे देण्यात आली. हे प्लॅटफॉर्म बंद करण्याचा निर्णय त्याची मूळ कंपनी IAC ने घेतला आहे. कंपनीने म्हटले आहे की, ते आता आपला सर्च व्यवसाय पूर्णपणे बंद करत असून आपले लक्ष इतर क्षेत्रांकडे वळवत आहेत. Ask.com ने जवळपास 25 वर्षे वापरकर्त्यांच्या प्रश्नांची उत्तरे देण्याचे काम केले, परंतु आता कंपनीला वाटले की हा व्यवसाय पुढे चालू ठेवणे योग्य नाही.

तंत्रज्ञान क्षेत्रात झपाट्याने झालेल्या बदलांमुळे आणि वापरकर्त्यांच्या सवयी बदलल्यामुळे Ask.com चे महत्त्व कमी होत गेले. विशेषतः AI-आधारित सर्च टूल्सच्या वाढत्या वापरामुळे पारंपरिक सर्च इंजिन्सना मोठे आव्हान निर्माण झाले आहे असे वृत्त एनडीटीव्हीने दिले आहे.

काळाच्या ओघात, सर्च इंजिनचे जग लक्षणीयरीत्या बदलले आहे. गूगलसारख्या प्रमुख प्लॅटफॉर्म्सनी वापरकर्त्यांना अधिक जलद आणि अचूक परिणाम देऊन वेगाने बाजारपेठ काबीज केली आहे. इतकेच नव्हे, तर नवीन एआय (AI) तंत्रज्ञानाने शोध घेण्याच्या पद्धतीत आमूलाग्र बदल घडवला आहे. या घटकांमुळे, Ask.com ची लोकप्रियता हळूहळू कमी झाली आणि त्याचा वापरकर्ता वर्गही घटला. यामुळे कंपनीने बंद करण्याचा निर्णय घेतला.