>>गणेशकाळे<<

जगप्रसिद्ध अब्जाधीश आणि 'टेस्लाकार' इलॉन मस्क यांनी कृत्रिम बुद्धिमत्ता, अवकाश तंत्रज्ञान आणि प्रगत संगणनशक्ती यांचा संगम घडवून आणणाऱ्या एका अत्यंत मोठय़ा औद्योगिक उपक्रमाची कल्पना मांडली आहे.

या उपक्रमाचे नाव आहे 'टेराफॅब.' जगातील सर्वात मोठय़ा सेमीकंडक्टर उत्पादन प्रकल्पांपैकी एक म्हणून या संकल्पनेची चर्चा सुरू आहे. भविष्यातील कृत्रिम बुद्धिमत्ता प्रणाली, स्वयंचलित रोबोटस्, उपग्रह नेटवर्क आणि अवकाशाधारित संगणकीय व्यवस्था यांसाठी लागणाऱ्या प्रचंड प्रमाणातील चिप्स एका ठिकाणी तयार करणे शक्य व्हावे, हा यामागचा मुख्य उद्देश आहे. या एका प्रकल्पातून बाहेर पडणाऱ्या चिप्स भविष्यातील जगाची आणि अंतराळातील वसाहतींची दिशा ठरवणार आहेत.

तंत्रज्ञान आणि कल्पकतेच्या जोरावर अशक्यप्राय गोष्टी शक्य करून दाखवणाऱ्या इलॉन मस्क यांनी आता जागतिक सेमीकंडटर उद्योगाला एक नवी दिशा दिली आहे. टेस्ला आणि स्पेसएक्स या आपल्या बलाढय़ कंपन्यांच्या माध्यमातून मस्क यांनी 'टेराफॅब' या अत्यंत महत्त्वाकांक्षी प्रकल्पाची घोषणा केली असून हा प्रकल्प केवळ पृथ्वीवरील गरजांबरोबरच अवकाशातील संगणकीय भविष्यावरही आपली मोहोर उमटवणार आहे. ऑस्टिनमध्ये नुकत्याच समोर आलेल्या या आराखडय़ामुळे संपूर्ण तंत्रज्ञान विश्वात खळबळ उडाली आहे.

'टेराफॅब' ही कल्पना मुख्यत्वे टेस्ला आणि स्पेसएक्स या दोन कंपन्यांच्या संयुक्त गरजांमधून पुढे आली आहे. इलेक्ट्रिक वाहनांमध्ये वापरल्या जाणाऱ्या प्रगत संगणकीय प्रणालींपासून ते कृत्रिम बुद्धिमत्तेवर चालणाऱ्या रोबोटपर्यंत अनेक उपकरणांना अत्यंत शक्तिशाली सेमीकंडक्टरची आवश्यकता असते. त्याच वेळी उपग्रह नेटवर्क, अवकाश मोहिमा आणि भविष्यातील अवकाशाधारित डेटा सेंटर यांसाठीही उच्च क्षमतेच्या चिप्स लागणार आहेत. आज जगातील बहुतेक मोठय़ा तंत्रज्ञान कंपन्या सेमीकंडक्टर पुरवठय़ासाठी बाह्य कंपन्यांवर अवलंबून आहेत. या अवलंबित्वामुळे पुरवठा साखळीत अडथळे निर्माण होऊ शकतात. 'टेराफॅब'च्या माध्यमातून ही अडचण कमी करून स्वतःची स्वतंत्र उत्पादन व्यवस्था उभारण्याचा प्रयत्न केला जात आहे.

हा प्रकल्प जगातील आतापर्यंतचा सर्वात मोठा सेमीकंडक्टर निर्मिती प्रकल्प ठरणार आहे. या सुविधेचा मुख्य उद्देश कृत्रिम बुद्धिमत्ता अर्थात आर्टिफिशल इंटेलिजन्ससाठी लागणारे हार्डवेअर, स्वयंचलित वाहनांसाठी लागणाऱ्या चिप्स आणि प्रगत संगणकीय प्रणालींची निर्मिती करणे हा आहे. गेल्या काही काळापासून जागतिक बाजारपेठेत या घटकांची मागणी ज्या वेगाने वाढली आहे, ती पाहता मस्क यांनी स्वतःच्याच कंपन्यांमध्ये या घटकांचे उत्पादन करण्याचा घेतलेला निर्णय अत्यंत धोरणात्मक आणि भविष्याचा वेध घेणारा ठरला आहे.

या प्रकल्पाची व्याप्ती आणि त्याचे स्वरूप इतके विशाल आहे की, त्यामुळे प्रस्थापित सेमीकंडक्टर कंपन्यांसमोर मोठे आव्हान उभे राहिले आहे. 21 मार्च 2025 रोजी ऑस्टिन येथे करण्यात आलेल्या घोषणेनुसार, टेराफॅब ही पूर्णपणे अंतर्गत सेमीकंडक्टर उत्पादन करणारी संस्था असेल. याचा अर्थ असा की, यापुढे टेस्ला किंवा स्पेसएक्सला आपल्या उपकरणांसाठी बाह्य पुरवठादारांवर अवलंबून राहण्याची गरज भासणार नाही. चिप्सच्या पुरवठा साखळीत येणाऱ्या अडचणींवर कायमस्वरूपी तोडगा काढण्यासाठी मस्क यांनी हे पाऊल उचलले आहे.

या सुविधेची सर्वात लक्षवेधी बाब म्हणजे तिचा आकार. प्राथमिक माहितीनुसार, या प्रकल्पाचे एकूण क्षेत्रफळ तब्बल 10 कोटी चौरस फूट इतके असण्याची शयता आहे. कोणत्याही सध्याच्या सेमीकंडक्टर निर्मिती केंद्रापेक्षा हा आकार कित्येक पटीने मोठा आहे. केवळ जमिनीचा विचार केला तरी यासाठी हजारो एकर जागा लागणार आहे. ऑस्टिनमधील गिगाफॅक्टरी टेक्सासच्या परिसरात सुरुवातीला हा प्रकल्प होईल असे वाटले होते; परंतु मस्क यांनी स्पष्ट केले की, तिथे केवळ चिप डिझाईनची छोटी सुविधा असेल. मुख्य उत्पादन प्रक्रिया ही एका वेगळ्या आणि अवाढव्य जागेवर पार पडेल. यासाठी मस्क सध्या विविध ठिकाणांचा शोध घेत आहेत.

उत्पादन क्षमतेच्या बाबतीत बोलायचे झाले तर टेराफॅब दरमहा मोठय़ा प्रमाणात सेमीकंडक्टर वेफर्स तयार करण्यासाठी सज्ज असेल. पृथ्वीवरील संगणकीय गरजा पूर्ण करण्यासाठी हा प्रकल्प दरवर्षी 100 ते 200 गिगावॅट इतकी क्षमता प्रदान करेल. मात्र, मस्क यांची दृष्टी केवळ पृथ्वीपुरती मर्यादित नाही. स्पेसएक्सच्या माध्यमातून सुरू असलेल्या उपग्रह जाळ्यासाठी आणि अवकाशातील डेटा सेंटर्ससाठी लागणारी संगणकीय शक्तीही याच केंद्रातून पुरवली जाईल. काही अहवालांनुसार, या सुविधेची एकूण उत्पादन क्षमता एकाच छताखाली एक टेरावॅट प्रतिवर्ष इतकी असू शकते, जी मानवी इतिहासातील एक अभूतपूर्व कामगिरी ठरेल.

हा प्रकल्प केवळ व्यावसायिक फायद्यासाठी नसून तो एका मोठय़ा तांत्रिक क्रांतीचा भाग आहे. मस्क यांच्या 'ऑप्टिमस' रोबोटसाठी लागणारी बुद्धिमत्ता, टेस्लाच्या स्वयंचलित गाड्यांमधील प्रगत निर्णय क्षमता आणि स्पेसएक्सच्या उपग्रह जाळ्याद्वारे दिली जाणारी जागतिक इंटरनेट सेवा या सर्वांचा कणा 'टेराफॅब'मध्ये तयार होणाऱ्या चिप्स असतील. बाह्य पुरवठादारांवरील अवलंबित्व संपल्यामुळे उत्पादनातील खर्च कमी होईल आणि तंत्रज्ञानातील गोपनीयतेवर मस्क यांचे पूर्ण नियंत्रण राहील.