नेपाळमध्ये आलेल्या महापुरात मृत्यूमुखी पडलेल्यांची संख्या रविवारी दुपारी ३ वाजेपर्यंत ७८८ वर पोहोचली असल्याची माहिती नेपाळ पोलिसांनी दिली आहे. अद्यापही २५०२ पेक्षा जास्त लोक बेपत्ता असून, देशातील अनेक बाधित भागांमध्ये बचाव आणि मदतकार्य वेगाने सुरू आहे.
ANI ने दिलेल्या वृत्तानुसार, या महापुरात सर्वाधिक जीवितहानी चितवन जिल्ह्यात झाली असून तिथे २६४ जणांचा मृत्यू झाला आहे. त्याखालोखाल नवलपरासी पूर्वमध्ये १९४, नवलपरासी पश्चिममध्ये १२०, गोरखा ५८, नुवाकोट ५२, धाडिंग ५०, तनहुन ३७ आणि रसुवा येथे १३ जणांचा बळी गेला आहे. देशभरातील २१ रुग्णालयांमध्ये अज्ञात मृतदेह ठेवण्यात आले असून त्यांची ओळख पटवण्याचे काम सुरू आहे.
नेपाळच्या राष्ट्रीय आपत्ती जोखीम निवारण आणि व्यवस्थापन प्राधिकरणाने दिलेल्या माहितीनुसार, बेपत्ता असलेल्या २५०२ जणांमध्ये ९३३ जलविद्युत प्रकल्पातील कामगार, ५९२ परदेशी नागरिक आणि परदेशी गटांसोबत प्रवास करणाऱ्या १२७ नेपाळी नागरिकांचा समावेश आहे. विशेष म्हणजे नेपाळ पोलीस, नेपाळ लष्कर, सशस्त्र पोलीस दल, सीमाशुल्क आणि इमिग्रेशन कार्यालयातील अनेक कर्मचारी देखील बेपत्ता असल्याची नोंद आहे.
दरम्यान, या नैसर्गिक आपत्तीचा सामना करण्यासाठी सुमारे २०,००० सुरक्षा जवान मैदानात उतरले आहेत. आपत्तीग्रस्त भागात सहा विशेष वैद्यकीय पथके तैनात करण्यात आली असून, आतापर्यंत २३९ जखमी नागरिकांवर उपचार करण्यात आले आहेत.