>> अनीश दाते

कोणत्याही कालखंडाचा इतिहास हा त्या काळातील कलावंतांकडून घडलेल्या दृश्यकला माध्यमातून अधिकाधिक विस्तृतपणे उलगडत जातो असे म्हणतात ते यथार्थ आहे. महाराष्ट्राला दृश्यकलेतील कलावंतांची परंपरा लाभली आहे. कला इतिहासाचा ठेवा जपण्यासाठी विशेष प्रयत्न करावे लागतात. किंबहुना असा ठेवा लेख, पुस्तके आणि कोशरूपाने संकलित करून ठेवल्यास पुढील पिढय़ांना मार्गदर्शक ठरतो, परंतु महाराष्ट्रात चित्रशिल्पकलेच्या क्षेत्रात असे प्रयत्न कमी प्रमाणात झाले आहेत. त्यामुळे महाराष्ट्राच्या दृश्यकलेची परंपरा आणि कलावंत अज्ञातच राहिले आहेत. संगीत, नाटक क्षेत्रात महाराष्ट्राची कलापरंपरा जरी देशभर ज्ञात असली तरी चित्रशिल्पकलेच्या क्षेत्रात महाराष्ट्र मागासलेला असल्याचा गैरसमज पसरला आहे.