जागतिक बाजारांमधून मिळत असलेल्या नकारात्मक संकेतांमुळे राष्ट्रीय आणि मुंबई शेअर बाजारात गुरुवारीही घसरण दिसून आली. मुंबई शेअर बाजाराचा निर्देशांक सेन्सेक्स आणि निफ्टी सुमारे दीड टक्क्यांनी घसरले.
तर स्मॉल-कॅप आणि मिड-कॅप निफ्टी निर्देशांकही दीड टक्क्यांहून अधिक घसरले. प्रत्येक क्षेत्राचा निफ्टी निर्देशांक घसरणीत आहे.
बाजारात व्यवहाराला सुरुवात झाल्यानंतर घसरण सुरूच राहिली. सकाळी ११:०० वाजता निफ्टी ३५५.१५ अंकांनी, म्हणजेच १.४७% ने घसरून २३,८२२.५० वर, तर सेन्सेक्स १,१५१.२२ अंकांनी म्हणजेच १.४९% ने घसरून ७६,३४५.१४ वर व्यवहार करत होता. निफ्टी २३,७९९.०५ आणि सेन्सेक्स ७६,२५८.८६ वर पोहोचला होता. त्यामुळे गुंतवणूकदारांची चिंता वाढली आहे.
गुरुवारी बाजार सुरू होताच सेन्सेक्स आणि निफ्टी ५० हे दोन्ही निर्देशांक अल्पावधीतच जवळपास १.५ टक्क्यांनी कोसळले. तसेच प्रत्येक क्षेत्रात घसरण दिसून येत होती. बुधवारी सेन्सेक्स ७७४९६.३६ आणि निफ्टी ५० २४१७७.६५ वर बंद झाला होता. मात्र, गुरुवारी सुरुवातीच्या व्यवहारापासून मोठ्या विक्रीमुळे बाजारावर दबाव दिसून आला.
दुपारी 12 वाजण्याच्या सुमारास बाजाराने सावरण्याचा प्रयत्न केला. दुपारी 1 वाजण्याच्या सुमारास सेन्सेक्स 744.05 अंकांच्या म्हणजेच 0.96% घसरणीसह 76,778.97 वर व्यवहार करत होता. तर निफ्टी 238.20 अंकांच्या म्हणजेच 0.99% घसरणीसह 23,939.45 वर व्यवहार करत होता.
इराणसोबत शांतता करार होईपर्यंत अमेरिकेचे राष्ट्राध्यक्ष डोनाल्ड ट्रम्प यांनी होर्मुझमध्ये नाकेबंदी कायम ठेवण्याचा घेतलेला निर्णय आणि इराणने लष्करी कारवाईचा दिलेला इशारा यामुळे शेअर बाजारात घबराट वाढली. यामुळे कच्च्या तेलाच्या किमतीत मोठी वाढ झाली आणि त्या प्रति बॅरल १२० डॉलरवर पोहोचल्याने जागतिक स्तरावर घबराट पसरली. कच्च्या तेलाच्या किमतीतील या वाढीमुळे महागाईचा दर, वित्तीय संतुलन आणि चलनाची स्थिरता याबद्दल चिंता वाढली आहे, त्यामुळे शेअर बाजारात घसरण होत आहे.
अमेरिकेच्या फेडरल रिझर्व्हने व्याजदर स्थिर ठेवण्याच्या निर्णयामुळे जगभरातील बाजारांवर दबाव आला. वाढत्या ऊर्जा किमतींच्या भीतीमुळे अमेरिका ते आशियापर्यंतच्या बहुतेक बाजारांमध्ये मोठी घसरण झाली, ज्याचा परिणाम देशांतर्गत शेअर बाजारावरही जाणवला. बाजारातील चिंतेचे मापक असलेल्या इंडिया विक्समधील वाढीने वाढत्या अनिश्चिततेचे संकेत दिले, ज्यामुळे घाबरलेल्या गुंतवणूकदारांनी शेअर्सची विक्री केली. इंडिया व्हीआयएक्स ५% पेक्षा जास्त वाढून १८ च्या पुढे गेला.
आज बाजार उघडताच, सुरुवातीच्या व्यवहारात मोठ्या प्रमाणावर विक्री सुरू झाली. सार्वजनिक क्षेत्रातील बँका, धातू आणि टिकाऊ ग्राहक वस्तूंचे निफ्टी निर्देशांक प्रत्येकी २% पेक्षा जास्त घसरले, तर ऑटो, एफएमसीजी, खाजगी बँका आणि रिअल्टीचे निफ्टी निर्देशांकही प्रत्येकी १.५% पेक्षा जास्त घसरले. कच्च्या तेलाच्या दबावामुळे भारतीय चलनावर इतका दबाव आला की एका डॉलरची किंमत ९५.२६ पर्यंत घसरली. ३० मार्चनंतर पहिल्यांदाच याने ९५ चा टप्पा ओलांडला आहे. कच्च्या तेलाच्या किमती वाढल्याने जागतिक बाजारातील तणाव वाढला, आशियाई बाजारपेठांमध्ये मंदी आली आणि जपानी बाँड यील्डने २९ वर्षांतील उच्चांक गाठला. या सर्व कारणांमुळे बाजारात घसरण दिसून आली.