('सिरि' म्हणजे 'ॲपल'च्या भ्रमणभाषवरील एक सुविधा ज्याद्वारे वेगवेगळे कार्य करून घेता येऊ शकतात)

उज्जैन (मध्यप्रदेश) - 'ॲपल' आस्थापनाच्या 'सिरि' (Siri) या सुविधेवर 'जय श्रीराम' किंवा 'जय माता दी' म्हटल्यावर कोणताही प्रतिसाद दिला जात नाही; मात्र 'सलाम वालेकुम' म्हटल्यावर त्वरित प्रतिक्रिया मिळते.

१. ज्योतिषाचार्य पंडित पवन पाठक यांचा दावा आहे की, त्यांनी १० ते १५ आयफोनवर याची तपासणी केली. त्यांचे म्हणणे आहे की, 'जय श्रीराम' किंवा 'जय माता दी' बोलल्यास सिरि कोणतेही स्पष्ट उत्तर देत नाही किंवा शांत रहाते, तर 'सलाम वालेकुम' म्हटल्यावर त्वरित प्रतिसाद देते. भारत 'ॲपल'साठी एक मोठी बाजारपेठ असून येथे कोट्यवधी वापरकर्ते आहेत. अशा परिस्थितीत सर्व धर्मांचा समान आदर केला गेला पाहिजे. यात सुधारणा न झाल्यास ग्राहकांना 'आयफोन'वर बहिष्कार टाकण्याचे आवाहन केले जाईल.

२. विहिंपचे जिल्हाध्यक्ष राजेश आंजना यांनी मुख्यमंत्री डॉ. मोहन यादव यांना लिहिलेल्या पत्रात याला 'नियोजित जिहाद' म्हटले आहे. तसेच 'हा हिंदूंच्या श्रद्धेवर झालेला आघात आहे', असे म्हटले आहे. जोपर्यंत ॲपल ही कथित तांत्रिक त्रुटी दूर करत नाही, तोपर्यंत राज्यातील ॲपलचे सर्व स्टोअर्स बंद करण्यात यावेत, असे विहिंपचे म्हणणे आहे.

३. उज्जैनमधून प्रारंभ झालेला हा विरोध आता सामाजिक माध्यमांतूनही होत आहे. यातून मोठे आंदोलन होऊ शकते. तंत्रज्ञानात कोणत्याही प्रकारचा धार्मिक भेदभाव खपवून घेतला जाणार नाही, असे लोकांचे म्हणणे आहे.

ॲपलचे 'सिरि' हे आवाजावर आधारित आभासी सहाय्यक आहे. ते वापरकर्त्यांच्या आवाजातील आदेश समजून विविध कामे करते. उदा. हवामान, बातम्या, शेअर बाजार, क्रीडा निकाल यांची माहिती वापरकर्ते मिळवू शकतात. गाणी वाजवता येतात, तसेच नकाशामध्ये मार्गदर्शन मिळवता येते. या आभासी साहाय्यकामुळे स्मार्ट होम उपकरणे नियंत्रित करता येतात.