भारतीय हवामान विभागाने केरळमध्ये ४ जून या दिवशी पावसाचे आगमन होण्याची शक्यता वर्तवली आहे. सामान्यतः पावसाला केरळ येथून गोव्यात पोचण्यासाठी काही दिवस लागतात. त्यामुळे गोव्यातील ५ जून हा पारंपरिक आगमनाचा दिनांक यंदा गाठला जाण्याची शक्यता अल्प आहे. गोव्यात अधूनमधून पावसाळापूर्व सरी कोसळत रहाण्याची शक्यता असून त्यामुळे उकाड्यापासून काहीसा दिलासा मिळू शकतो. गेल्या दशकातील नोंदींनुसार गोव्यात पावसाचे विलंबाने आगमन होण्याचे प्रमाण वाढले आहे. वर्ष २०१६ आणि २०१९ मध्ये पावसाला लक्षणीय विलंब झाला होता. त्याचप्रमाणे वर्ष २०२२ मध्ये १० जून आणि वर्ष २०२३ मध्ये ११ जून या दिवशी पाऊस गोव्यात पोचला होता. वर्ष २०२४ मध्ये तो जवळपास वेळेत आला होता, तर वर्ष २०२५ मध्ये पाऊस अपेक्षेपेक्षा पुष्कळ लवकर पोचला होता. हवामान खात्याने पुढील आठवडाभर हलका ते मध्यम पाऊस आणि मेघगर्जनेसह सरी पडण्याचा अंदाज वर्तवला आहे. काही ठिकाणी विजांचा कडकडाट आणि ताशी ५० कि.मी. वेगाने वारे वहाण्याची शक्यता वर्तवण्यात आली आहे.

मौसमी पावसाला विलंब झाल्यास पिण्याच्या पाण्याची समस्या राज्यात उद्भवू शकते. काही जलसाठ्यांमध्ये प्रतिवर्षाप्रमाणे पाणी असले, तरी पावसाला विलंब झाल्यास आणि सध्याच्या वाढत्या उष्णतेमुळे ते संपण्याची भीती आहे. प्रशासनाने ही नैसर्गिक आपत्ती ओळखून आताच काही उपाययोजना करणे अधिक श्रेयस्कर ठरेल, असे तज्ञांचे मत आहे.