पुणे - 'ऑपरेशन सिंदूर' अजून संपलेले नाही. सध्या केवळ युद्धविरामासारखी स्थिती आहे. आवश्यकता भासल्यास भारतीय सैन्याच्या तीनही शाखा 'ऑपरेशन सिंदूर २'साठी पूर्णपणे सज्ज आहेत, असे सैन्यप्रमुख जनरल उपेंद्र द्विवेदी यांनी सांगितले.

भविष्यातील युद्धांचे स्वरूप आणि तंत्रज्ञान याविषयी संबोधित करतांना 'भविष्यातील लढाया केवळ भूमी, हवा आणि समुद्र यांच्या पुरत्या मर्यादित न रहाता त्या सायबर, अंतराळ आणि आधुनिक तंत्रज्ञान क्षेत्रांमध्ये लढल्या जातील', असे सैन्यदलप्रमुखांनी सांगितले.

१. आधुनिक युद्ध पूर्णपणे पारदर्शक झाले असून शत्रूच्या प्रत्येक हालचालीवर २४ घंटे लक्ष ठेवले जात आहे.

२. भारतीय सेना 'डीकेड ऑफ ट्रान्सफॉर्मेशन' (वर्ष २०२३ ते २०३२ या दशकात भारतीय सैन्य अधिक आधुनिक चपळ आणि तंत्रज्ञानाने सुसज्ज बनवण्याचे काम चालू आहे.) या उपक्रमांतर्गत भविष्यातील आव्हानांसाठी आधुनिक सैनिकी संरचनेत पालट करत आहे.

३. माहिती युद्ध जिंकण्यासाठी देशातील नागरिक आणि संस्था यांच्यातील परस्पर विश्वास अत्यंत आवश्यक आहे.

४. 'ऑपरेशन सिंदूर'ने एक मानक आखून दिला असून भारत कोणत्याही चिथावणीला चोख प्रत्त्युत्तर देतो, हे त्याने जगाला दाखवून दिले आहे.