05 जुलै : महाराष्ट्र शासनाच्या कृषी विभागातर्फे आयोजित बाजरी पीक स्पर्धेत फलटण तालुक्यातील गिरवी येथील प्रगतशील व प्रयोगशील शेतकरी अनिल कदम यांनी सातारा जिल्ह्यात तृतीय क्रमांक पटकावला आहे. कृषी दिनानिमित्त फलटण पंचायत समितीमध्ये मान्यवरांच्या हस्ते त्यांचा सन्मानपत्र आणि रोप देऊन विशेष गौरव करण्यात आला.

पंचायत समितीच्या सभागृहात आयोजित कृषी दिनाच्या कार्यक्रमात अनिल कदम यांचा सत्कार करण्यात आला. यावेळी पंचायत समितीच्या सभापती शिवांजली भोसले, गटविकास अधिकारी अक्षय गव्हाटे, कृषी अधिकारी दत्तात्रय गायकवाड आणि उपविभागीय कृषी अधिकारी खलीद मोमीन यांच्या हस्ते त्यांना सन्मानपत्र व जांभळाचे रोप देण्यात आले. कदम हे सेंद्रिय आणि नैसर्गिक शेतीचे अभ्यासक असून त्यांच्या या यशाबद्दल सर्वत्र कौतुक होत आहे.

सत्काराला उत्तर देताना अनिल कदम यांनी फलटण तालुक्यात महात्मा फुले कृषी विद्यापीठ आणि कृषी विभागाच्या वतीने कृषी विज्ञान केंद्र व हवामान केंद्राची निर्मिती करावी, अशी अपेक्षा व्यक्त केली. तसेच, पंचायत समितीमध्ये दररोजचे बाजारभाव दर्शवणारा डिजिटल फलक सुरू करण्याची मागणी त्यांनी प्रशासनाकडे केली.

अनिल कदम यांच्या मागणीवर सभापती शिवांजली भोसले यांनी सकारात्मक प्रतिसाद दिला. आगामी काळात हवामान केंद्र, कृषी विज्ञान केंद्र आणि बाजारभाव फलक या संदर्भात पंचायत समिती पुढाकार घेऊन योग्य ती पावले उचलेल, अशी ग्वाही त्यांनी दिली. या कार्यक्रमाचे प्रास्ताविक व आभार कृषी अधिकारी नवनाथ फडतरे यांनी मानले, तर सूत्रसंचालन सहायक कृषी अधिकारी नेवसे यांनी केले.