स्थैर्य, सातारा, दि. २ जुलै : भारत निवडणूक आयोगाने जाहीर केलेल्या विशेष सखोल मतदार यादी पुनरिक्षण कार्यक्रमाची तात्काळ अंमलबजावणी करावी, असे सक्त निर्देश सातारा जिल्ह्याचे जिल्हाधिकारी संतोष पाटील यांनी सर्व मतदार नोंदणी अधिकाऱ्यांना दिले आहेत.
एकही पात्र मतदार नोंदणीपासून वंचित राहू नये आणि कोणत्याही अपात्र नावाचा यादीत समावेश होऊ नये, हा या मोहिमेचा मुख्य उद्देश आहे.
या विशेष सखोल पुनरिक्षण कार्यक्रमासंदर्भात आढावा घेण्यासाठी जिल्हाधिकारी संतोष पाटील यांच्या अध्यक्षतेखाली नुकतीच एक महत्त्वाची बैठक पार पडली.
३,५०० कर्मचाऱ्यांची नियुक्ती: या विशेष सखोल पुनरिक्षण कार्यक्रमासाठी जिल्ह्यात तब्बल ३,५०० कर्मचाऱ्यांची नियुक्ती करण्यात आली आहे. हे एक महत्त्वाचे राष्ट्रीय काम असल्याने सर्व संबंधित अधिकाऱ्यांनी याला सर्वोच्च प्राधान्य द्यावे.
ग्रामीण भागावर विशेष लक्ष: ग्रामीण भागातील मतदार नोंदणी आणि पुनरिक्षणाच्या कामावर गटविकास अधिकाऱ्यांनी (BDO) विशेष लक्ष केंद्रित करावे.
नियुक्त शिक्षकांना शालेय कामातून सूट: ज्या शिक्षकांची या निवडणूक विषयक कामासाठी नियुक्ती करण्यात आली आहे, त्यांना त्यांच्या नेहमीच्या शालेय कामातून विशेष सूट देण्यात यावी. त्यांच्या अनुपस्थितीत त्यांचे काम शाळेतील इतर शिक्षकांनी सांभाळावे.
कागदपत्रांची काटेकोर तपासणी: या कार्यक्रमांतर्गत कर्मचाऱ्यांनी घरोघरी भेटी (गृह भेटी) देताना मतदारांच्या कागदपत्रांची अत्यंत काटेकोरपणे तपासणी करावी, अशा सूचना जिल्हाधिकाऱ्यांनी दिल्या.
या महत्त्वपूर्ण बैठकीला उपजिल्हा निवडणूक अधिकारी भगवान कांबळे यांच्यासह विविध प्रशासकीय विभागांचे अधिकारी उपस्थित होते.