नसरापूर (जि. पुणे) येथे घडलेल्या भीषण अत्याचाराच्या घटनेचा निषेध करण्यासाठी आणि निष्पाप बालिकेला श्रद्धांजली वाहण्यासाठी आज (४ मे) सायंकाळी ६:३० वाजता फलटण येथे जाहीर सभेचे आयोजन.

नागरिकांना उपस्थित राहण्याचे आवाहन.

स्थैर्य, फलटण, दि. 4 मे : पुणे जिल्ह्यातील नसरापूर (तालुका भोर) येथे नुकत्याच घडलेल्या एका निष्पाप बालिकेवरील भीषण अत्याचाराच्या घटनेमुळे संपूर्ण राज्य व देशात संतापाची लाट उसळली आहे. समाजाला काळीमा फासणाऱ्या या अमानुष घटनेचा तीव्र शब्दांत निषेध नोंदवण्यासाठी आणि त्या पीडित निष्पाप बालिकेला श्रद्धांजली अर्पण करण्यासाठी फलटण येथे आज (सोमवार, दि. ४ मे २०२६) 'जाहीर निषेध आणि श्रद्धांजली सभेचे' आयोजन करण्यात आले आहे.

ही निषेध व श्रद्धांजली सभा आज सायंकाळी ठीक ६.३० वाजता फलटण शहरातील शंकर मार्केट परिसरातील लोकमान्य टिळक स्मारक (पुतळा) येथे पार पडणार आहे.

या घटनेतील नराधमांना लवकरात लवकर कठोर शिक्षा व्हावी आणि अशा घटनांना आळा बसावा, यासाठी समाजातील सर्व घटकांनी एकत्र येणे गरजेचे आहे. या घटनेचा सामूहिक निषेध करण्यासाठी आणि त्या निष्पाप बालिकेप्रती आपल्या भावना व श्रद्धांजली व्यक्त करण्यासाठी फलटण शहर व तालुक्यातील सर्व बंधू-भगिनींनी, तसेच जागरूक नागरिकांनी या सभेला मोठ्या संख्येने उपस्थित राहावे, असे आवाहन करण्यात आले आहे.