ग्रामविकास मंत्री जयकुमार गोरे आणि माजी खासदार रणजितसिंह नाईक निंबाळकर यांच्या प्रमुख उपस्थितीत हा पक्षप्रवेश पार पडला. फलटण शहराच्या राजकारणातील मोठा राजकीय फेरबदल मानला जात आहे.

माजी खासदार रणजितसिंह नाईक निंबाळकर यांच्या जनसंपर्क कार्यालयात आयोजित कार्यक्रमात प्रमोद निंबाळकर यांचे पक्षात स्वागत करण्यात आले. प्रवेशानंतर बोलताना प्रमोद निंबाळकर म्हणाले की, फलटण शहर व तालुक्याचा सर्वांगीण विकास साधण्यासाठी माजी खासदार रणजितसिंह नाईक निंबाळकर यांच्या नेतृत्वाखाली भाजपमध्ये प्रवेश करण्याचा निर्णय घेतला आहे. पक्षाने दिलेली प्रत्येक जबाबदारी अत्यंत निष्ठेने पूर्ण केली जाईल. आमदार सचिन पाटील आणि नगराध्यक्ष समशेरसिंह नाईक निंबाळकर यांच्यासोबत मिळून शहराच्या विकासाची कामे वेगाने केली जातील.

प्रमोद निंबाळकर हे फलटणच्या सामाजिक, राजकीय आणि व्यावसायिक वर्तुळात एक परिचित नाव आहे. त्यांनी यापूर्वी फलटण नगरपरिषदेच्या शिक्षण मंडळाचे सभापती, बिल्डर असोसिएशन ऑफ इंडिया फलटण सेंटरचे संस्थापक अध्यक्ष, तसेच लायन्स क्लबचे सचिव म्हणून कार्य केले आहे. राजकीय क्षेत्रात त्यांनी राष्ट्रवादी काँग्रेसचे शहराध्यक्षपद आणि राष्ट्रवादी युवक काँग्रेसचे सरचिटणीसपद यशस्वीपणे सांभाळले आहे. त्यांच्या या प्रवेशामुळे भाजपची शहरात ताकद वाढणार आहे.