न्यायालयाच्या या निर्णयामुळे 2020 पासून चर्चेत असलेल्या दिशा सालियन मृत्यू प्रकरणाला पुन्हा एकदा वेगळे वळण मिळाले आहे.

वडिलांनी केली होती नव्याने तपासाची मागणी

दिशा सालियन यांच्या मृत्यूबाबत सखोल आणि निष्पक्ष चौकशी व्हावी, अशी मागणी त्यांचे वडील सतीश सालियन यांनी याचिकेद्वारे केली होती. त्यांच्या याचिकेवर यापूर्वी सुनावणी पूर्ण झाली होती आणि न्यायालयाने निकाल राखून ठेवला होता.

आता न्यायालयाने FIR नोंदवून तपास करण्याचे निर्देश दिल्याची माहिती आहे. तसेच तपासासाठी वरिष्ठ अधिकाऱ्याची नियुक्ती करण्यासंदर्भातही आदेश देण्यात आल्याचे सांगितले जात आहे. मालवणी पोलिसांकडील प्रकरणाशी संबंधित कागदपत्रे CBIकडे सोपवण्याचे निर्देशही देण्यात आल्याची माहिती आहे.

पुराव्यांच्या आधारेच पुढील कारवाई

दिशा सालियन यांच्या कुटुंबीयांच्या वतीने बाजू मांडणारे वकील निलेश ओझा यांनी न्यायालयाच्या आदेशानंतर प्रतिक्रिया दिली. तपासादरम्यान पुराव्यांच्या आधारे ज्यांची भूमिका समोर येईल, त्यांच्यावर कायदेशीर कारवाई केली जाईल, तर पुरावा नसलेल्या व्यक्तींना आरोपी बनवले जाणार नाही, अशी न्यायालयाची भूमिका असल्याचे त्यांनी सांगितले.

CBIच्या तपासातून नकारात्मक अहवाल आल्यास त्याविरोधात कायदेशीर मार्गाचा अवलंब करण्याचा अधिकार कुटुंबीयांना असेल, असेही त्यांनी स्पष्ट केले.

8 जून 2020 रोजी झाला होता मृत्यू

दिशा सालियन यांचा 8 जून 2020 रोजी मुंबईतील मालाड परिसरात एका इमारतीवरून पडून मृत्यू झाला होता. त्यावेळी पोलिसांनी या घटनेची नोंद अपघाती मृत्यू म्हणून केली होती. दिशा या मनोरंजन क्षेत्रात सेलिब्रिटी मॅनेजर म्हणून कार्यरत होत्या आणि त्यांनी अनेक प्रसिद्ध कलाकारांसोबत काम केले होते.

दिशा सालियन यांच्या मृत्यूनंतर काही दिवसांतच अभिनेता सुशांत सिंह राजपूत यांचा मृत्यू झाल्याने दोन्ही प्रकरणांना जोडून विविध दावे आणि आरोप केले गेले. त्यामुळे हे प्रकरण महाराष्ट्राच्या राजकीय वर्तुळातही अनेकदा चर्चेत आले.

आरोपांची चौकशी आता CBI करणार

दिशा सालियन यांच्या वडिलांनी मुलीच्या मृत्यूबाबत गंभीर संशय व्यक्त करत नव्याने तपासाची मागणी केली होती. त्यांच्या याचिकेवरील निर्णयानंतर आता या प्रकरणाचा तपास CBIकडे जाण्याची प्रक्रिया सुरू होणार आहे.

दरम्यान, दिशांच्या मृत्यूबाबत यापूर्वी समोर आलेल्या वैद्यकीय आणि पोलिस नोंदींमध्ये लैंगिक अत्याचार झाल्याचे निष्पन्न झाले नव्हते. त्यामुळे नव्या तपासातून नेमके कोणते तथ्य समोर येते आणि दिशांच्या मृत्यूचे कारण काय होते, याकडे आता सर्वांचे लक्ष लागले आहे.