बिहारमधील बांकीपूर विधानसभा पोटनिवडणुकीत जन सुराज पक्षाचे संस्थापक प्रशांत किशोर यांनी दणदणीत विजय मिळवल्यानंतर राज्यातील राजकीय वातावरण तापले आहे. या निकालावर प्रतिक्रिया देताना राष्ट्रीय जनता दलाच्या (राजद) खासदार मीसा भारती यांनी प्रशांत किशोर यांच्यावर तसेच भाजपवर जोरदार टीका केली.
प्रशांत किशोर यांचा विजय म्हणजे अप्रत्यक्षपणे भाजपचाच विजय असल्याचा दावा त्यांनी केला.
बांकीपूर मतदारसंघात प्रशांत किशोर यांनी भाजपचे उमेदवार नीरज कुमार यांचा मोठ्या मताधिक्याने पराभव केला. सलग अनेक वर्षे भाजपच्या ताब्यात असलेली ही जागा जन सुराज पक्षाने जिंकत मोठा राजकीय संदेश दिला आहे.
निकालानंतर माध्यमांशी बोलताना मीसा भारती म्हणाल्या की, भाजपचा उमेदवार पराभूत झाला असला तरी प्रशांत किशोर यांच्या विजयाचा फायदा अखेरीस भाजपलाच होणार आहे. त्यामुळे हा निकाल भाजपसाठीही अनुकूल असल्याचा दावा त्यांनी केला. तसेच या निवडणुकीत भाजपने उमेदवार बदलण्यामागील कारणांवरही त्यांनी प्रश्नचिन्ह उपस्थित केले.
प्रशांत किशोर यांनी मतदारांना अनेक आश्वासने दिली असून त्यांची पूर्तता प्रत्यक्षात करणे कोणत्याही आमदार किंवा खासदारासाठी सोपे नसल्याचेही मीसा भारती यांनी म्हटले. बांकीपूरसारख्या मतदारसंघात विकासाच्या अनेक प्रश्नांवर अजूनही काम होणे बाकी असल्याचा आरोप त्यांनी केला.
यावेळी त्यांनी प्रशांत किशोर यांच्यावर कठोर शब्दांत टीका करत, ते भाजपच्या भूमिकेला पूरक काम करत असल्याचा आरोप केला. बिहारमधील तरुण आणि मतदारांची दिशाभूल होत असल्याचेही त्या म्हणाल्या.
दरम्यान, विजय मिळाल्यानंतर प्रशांत किशोर यांनी बिहारमधील नेतृत्वाबाबतही भाष्य केले. राज्यातील सत्ताधारी पक्षाने नेतृत्वात बदल करण्याचा विचार करावा, असा सल्लाही त्यांनी भाजपच्या वरिष्ठ नेतृत्वाला दिल्याने बिहारच्या राजकारणात नव्या चर्चांना सुरुवात झाली आहे.