मुंबई,

Mumbai won after changing captain मुंबई इंडियन्सने सोमवारी झालेल्या सामन्यात दमदार पुनरागमन करत प्रभावी विजय नोंदवला, आणि या विजयात कर्णधारपदाची धुरा अचानक सांभाळणाऱ्या सूर्यकुमार यादवची भूमिका ठळक ठरली.

नियमित कर्णधार हार्दिक पांड्या प्रकृती अस्वस्थ असल्यामुळे या सामन्यात खेळू शकला नाही, त्यामुळे सूर्यकुमारकडे नेतृत्वाची जबाबदारी आली. त्याने ती समर्थपणे पार पाडत संघाला विजयाच्या दिशेने नेले.सामन्याची सुरुवात प्रतिस्पर्धी संघाने फलंदाजी करत मोठी धावसंख्या उभारून केली. त्यांनी दोनशेहून अधिक धावा करत मुंबईसमोर कठीण लक्ष्य ठेवले. या आव्हानाचा पाठलाग करताना मुंबईला भक्कम सुरुवात आवश्यक होती, आणि ती सलामीच्या फलंदाजांनी शानदार पद्धतीने करून दिली. रायन रिकेल्टन आणि रोहित शर्मा यांनी पहिल्या विकेटसाठी धडाकेबाज भागीदारी करत संघाची पायाभरणी मजबूत केली.

रिकेल्टनने आक्रमक फलंदाजी करत केवळ ३२ चेंडूंमध्ये ८३ धावा केल्या, तर रोहित शर्मानेही दीर्घकाळ अपेक्षित असलेली मोठी खेळी साकारत ४४ चेंडूंमध्ये ८४ धावा केल्या. रोहितच्या या खेळीने संघाला आत्मविश्वास मिळाला. विशेष म्हणजे, दुखापतीमुळे काही काळ संघाबाहेर राहिल्यानंतर त्याने असे पुनरागमन केले, यामुळे चाहत्यांमध्ये उत्साह वाढला.या दमदार सुरुवातीचा फायदा घेत मुंबईने लक्ष्याचा पाठलाग करताना अखेर आठ चेंडू शिल्लक असताना चार गडी गमावून विजय मिळवला. सलग पराभवांनंतर आलेला हा विजय संघासाठी महत्त्वाचा ठरला आहे. मात्र, या सामन्यानंतर काही प्रश्नही निर्माण झाले आहेत. हार्दिक पांड्या अचानक संघाबाहेर का राहिला आणि त्याच्या अनुपस्थितीत संघाची कामगिरी का उंचावली, यावर चर्चा सुरू आहे. मुंबई इंडियन्स अजूनही स्पर्धेतून बाहेर पडलेली नसली तरी पुढील टप्प्यात स्थान मिळवण्यासाठी त्यांना सातत्याने विजय मिळवावे लागतील. रोहितचा फॉर्म कायम राहतो का आणि हार्दिकच्या पुनरागमनानंतर संघाची घडी कशी बसते, याकडे आता सर्वांचे लक्ष लागले आहे.