हा रेल्वेमार्ग कावल-ताडोबा व्याघ्र प्रकल्पाला जोडणार्‍या महत्त्वपूर्ण वन्यजीव भ्रमणमार्गाचा भाग असून, वाघ, बिबटे, अस्वल आणि इतर वन्यप्राण्यांच्या सुरक्षित हालचालींसाठी अत्यंत महत्त्वाचा आहे. मात्र, या मार्गावर वारंवार होणार्‍या रेल्वे अपघातांमुळे वन्यजीवांच्या अस्तित्वाचा गंभीर प्रश्न निर्माण झाला आहे.

घटनेची माहिती मिळताच हॅबिटॅट कन्झर्व्हेशन सोसायटीच्या पथकाने घटनास्थळी पोहोचून प्रत्यक्ष पाहणी व शहानिशा केली. मृत बिबट्या हा अंदाजे 6 महिन्यांचा असल्याची माहिती संस्थेच्या पथकाने दिली. या घटनेमुळे वन्यजीवांच्या सुरक्षित भ्रमणासाठी प्रभावी उपाययोजना करण्याची गरज पुन्हा अधोरेखित झाली आहे.

घटनास्थळी हॅबिटॅट कन्झर्व्हेशन सोसायटीचे अध्यक्ष दिनेश खाटे, अमित देशमुख, नाजिश अली, अभिषेक गजबे, जितेंद्र नोमुलवार, रणजित मडावी, कार्तिक दरणे, वनविकास महामंडळाचे सहायक व्यवस्थापक कदम, रेल्वे पोलिस उपनिरीक्षक मोहम्मद मुगीसुद्दीन व रेल्वे सुरक्षा बलाचे ठोंबरे उपस्थित होते.

या रेल्वेमार्गावर सातत्याने होणारे वन्यजीवांचे मृत्यू रोखण्यासाठी रेल्वे विभाग व वन विभागाने समन्वयाने काम करणे आवश्यक आहे. रेल्वेचा वेग नियंत्रित करणे, संवेदनशील ठिकाणांची ओळख करून प्रभावी वन्यजीव संरक्षण उपाययोजना राबवणे आणि नियमित निरीक्षण वाढवणे ही काळाची गरज आहे, असे मत हॅबिटॅट कन्झर्व्हेशन सोसायटीने व्यक्त केले आहे.