केंद्रीय गृहमंत्री अमित शाह यांनी पुण्यात आयोजित करण्यात आलेल्या टिळक पुरस्कार सोहळ्याला उपस्थिती लावत लोकमान्य बाळ गंगाधर टिळक यांच्या कार्याला अभिवादन केले. काँग्रेसच्या आंदोलनाच्या पार्श्वभूमीवर कार्यक्रमस्थळी कडेकोट पोलिस बंदोबस्त ठेवण्यात आला होता. या सोहळ्यात राष्ट्रीय सुरक्षा सल्लागार अजित डोवाल यांना प्रतिष्ठेचा टिळक पुरस्कार प्रदान करण्यात आला. भाषणाच्या सुरुवातीला केंद्रीय गृहमंत्री अमित शाह यांनी लोकशाहीर अण्णाभाऊ साठे आणि लोकमान्य टिळक यांच्या जयंतीनिमित्त त्यांना आदरांजली वाहिली. अण्णाभाऊ साठे यांनी साहित्य आणि समाजजागृतीच्या माध्यमातून केलेल्या योगदानाचा उल्लेख करत त्यांनी त्यांच्या कार्याचे कौतुक केले.

अमित शाहांनी लोकमान्य टिळकांच्या स्वातंत्र्यलढ्यातील योगदानाचा गौरव करत त्यांचे विचार आजही देशाला दिशा देणारे असल्याचे सांगितले. लोकमान्य टिळकांनी स्वराज्याचा विचार केवळ घोषणांपुरता मर्यादित ठेवला नाही, तर तो जनतेच्या मनात रुजवण्याचे काम केले, असे अमित शाह म्हणाले. गणेशोत्सव आणि शिवजयंतीसारख्या सार्वजनिक उत्सवांद्वारे समाजाला एकत्र आणत त्यांनी सांस्कृतिक राष्ट्रवादाची मजबूत पायाभरणी केली. देशाच्या भविष्यासाठी टिळकांनी दाखवलेली दिशा आजही प्रेरणादायी असल्याचे त्यांनी नमूद केले. यावेळी अमित शाह यांनी विशेषतः तरुणांना लोकमान्य टिळकांनी लिहिलेल्या गीता रहस्यचा अभ्यास करण्याचे आवाहन केले. भगवद्गीतेतील विचार सामान्य माणसाच्या आयुष्यात कसे उतरवता येतात, याचे व्यवहार्य मार्गदर्शन या ग्रंथातून मिळते, असे सांगत त्यांनी तरुणांनी टिळकांचे साहित्य वाचण्याची गरज व्यक्त केली. अमित शाह यांनी टिळकांच्या पत्रकारितेचाही उल्लेख केला. केसरी आणि मराठा या वृत्तपत्रांद्वारे त्यांनी ब्रिटिश सत्तेविरोधात निर्भीडपणे आवाज उठवला.