मुंबईतील साकीनाका परिसरात घडलेल्या एका दुर्दैवी घटनेनंतर संपूर्ण राज्यातील महापालिका प्रशासन अधिक सतर्क झाले आहे. मुसळधार पावसाच्या पार्श्वभूमीवर उघडे किंवा धोकादायक मॅनहोल नागरिकांसाठी मोठा धोका ठरू शकतात, हे पुन्हा एकदा समोर आले आहे. या घटनेनंतर ठाणे महापालिकेनेही तातडीने महत्त्वाची पावले उचलण्यास सुरुवात केली आहे. साकीनाका परिसरात मॅनहोलवर संरक्षक जाळी बसविण्याचे काम सुरू असताना एका व्यक्तीचा मॅनहोलमध्ये पडून दुर्दैवी मृत्यू झाला. या घटनेने संपूर्ण प्रशासन हादरले असून, संबंधित प्रकरणाची गंभीर दखल घेण्यात आली आहे.

निष्काळजीपणाबाबत जबाबदारी निश्चित करत संबंधित अधिकाऱ्यांवर तातडीने कारवाई करण्यात आल्याची माहिती समोर आली आहे. या घटनेचे पडसाद विधानसभेतही उमटले असून, पावसाळ्यात नागरिकांच्या सुरक्षेचा मुद्दा पुन्हा ऐरणीवर आला आहे. याच पार्श्वभूमीवर ठाणे महापालिकेने शहरातील सर्व मॅनहोलची तपासणी करण्याचा निर्णय घेतला आहे. ज्या ठिकाणी संरक्षणासाठी जाळ्या नाहीत, झाकण खराब आहे किंवा तातडीच्या दुरुस्तीची गरज आहे, अशा सर्व ठिकाणांचा स्वतंत्र अहवाल तयार करण्याच्या सूचना संबंधित विभागांना देण्यात आल्या आहेत. ठाणे महापालिका क्षेत्रात ड्रेनेज आणि गटारांशी संबंधित दोन लाखांहून अधिक मॅनहोल असल्याने ही मोहीम मोठ्या प्रमाणावर राबवली जात आहे. प्रत्येक प्रभागातील अभियंते आणि संबंधित अधिकारी प्रत्यक्ष पाहणी करून धोकादायक ठिकाणांची माहिती गोळा करत आहेत.