नसरापूर येथील अल्पवयीन बालिकेवरील लैंगिक अत्याचार आणि खून प्रकरणातील खटल्याची विशेष न्यायालयात गुरुवारी महत्त्वपूर्ण सुनावणी पार पडली. या सुनावणीत प्रकरणाच्या तपास प्रक्रियेला निर्णायक वळण मिळाले असून, आरोपी भीमराव कांबळे याच्याविरुद्ध आरोप निश्चित करण्यात आले आहेत. त्यामुळे या प्रकरणातील न्यायालयीन लढाई आता पुढील टप्प्यात पोहोचली आहे. या सुनावणीदरम्यान पोलिसांनी जलद तपास करत अवघ्या २८ दिवसांत संपूर्ण न्यायालयीन प्रक्रिया पूर्ण करण्याचा प्रयत्न केल्याचे समोर आले. फास्ट ट्रॅक कोर्टात आरोपीला पहिल्यांदाच प्रत्यक्ष हजर करण्यात आले.

या प्रकरणात पोलिसांनी गोळा केलेले महत्त्वाचे पुरावे, पीएम रिपोर्ट तसेच विविध वैद्यकीय तपासण्यांचे अहवाल न्यायालयात सादर करण्यात आले. तपास यंत्रणेने मजबूत पुराव्यांच्या आधारे प्रकरण न्यायालयात मांडल्याचे दिसून आले. सुनावणीदरम्यान दोन्ही बाजूंनी जोरदार युक्तिवाद झाला. सरकारी पक्षाकडून आरोपीविरुद्ध गंभीर आरोप ठेवण्यात आले, तर बचाव पक्षाकडून आरोप फेटाळण्याचा प्रयत्न करण्यात आला. मात्र, बचाव पक्षाकडून न्यायालयासमोर ठोस पुरावे सादर करण्यात अपयश आले. त्यामुळे न्यायालयाने उपलब्ध पुराव्यांच्या आधारे आरोपी भीमराव कांबळे याच्यावर आरोप निश्चित करण्याचा निर्णय घेतला. या सुनावणीस विशेष सरकारी वकील ॲड. अजय मिसर, मूळ तक्रारदारांचे वकील, पुणे ग्रामीणचे पोलीस अधीक्षक संदीपसिंह गिल तसेच तपास अधिकारी उपस्थित होते. सर्व संबंधित यंत्रणा न्यायालयात हजर राहून प्रकरणाची सविस्तर मांडणी करण्यात आली.