गणेशोत्सवासाठी कोकणात जाणाऱ्या पुणे आणि पिंपरी-चिंचवडमधील प्रवाशांसाठी आनंदाची बातमी आहे. दरवर्षी बाप्पाच्या आगमनाच्या काळात कोकण रेल्वे मार्गावर मोठी गर्दी होत असल्याने यंदा मध्य रेल्वेने अतिरिक्त विशेष गाड्या चालवण्याचा निर्णय घेतला आहे. त्यामुळे प्रवाशांचा प्रवास अधिक सोयीस्कर होण्यास मदत होणार आहे. मध्य रेल्वेने गणेशोत्सवासाठी जाहीर केलेल्या २४६ विशेष गाड्यांपैकी पुणे ते रत्नागिरी दरम्यान १० विशेष गाड्या धावणार आहेत. यामध्ये ४ पूर्ण वातानुकूलित (AC) विशेष गाड्या आणि ६ एसी, स्लीपर तसेच जनरल डब्यांचा समावेश असलेल्या मिश्र गाड्यांचा समावेश आहे. त्यामुळे प्रवाशांना त्यांच्या गरजेनुसार प्रवासाचा पर्याय उपलब्ध होणार आहे.

एसी साप्ताहिक विशेष गाड्या १५ आणि २२ सप्टेंबर रोजी धावतील, तर मिश्र विशेष गाड्या १२, १९ आणि २६ सप्टेंबर रोजी प्रवाशांच्या सेवेत असतील. या सर्व गाड्या पुणे स्थानकातून मध्यरात्री १२.२५ वाजता सुटून सकाळी ११.५० वाजता रत्नागिरीला पोहोचतील. परतीच्या प्रवासात या गाड्या रत्नागिरीहून सायंकाळी ५.५० वाजता सुटून दुसऱ्या दिवशी सकाळी ५.२० वाजता पुण्यात दाखल होतील. प्रवाशांच्या सोयीसाठी या विशेष गाड्यांना चिंचवड, तळेगाव आणि लोणावळा या महत्त्वाच्या स्थानकांवर थांबा देण्यात आला आहे. त्यानंतर कल्याण, पनवेल, रोहा, माणगाव, खेड, चिपळूण, संगमेश्वर रोड आणि इतर स्थानकांमार्गे या गाड्या रत्नागिरीपर्यंत धावणार आहेत.