तुम्ही पण त्या लोकांपैकी आहात का ज्यांना कोणी काहीही काम सांगितलं तरी नाही म्हणताच येत नाही? मित्राने पार्टीला बोलावलं, मनात नसतानाही हो म्हणालात. ऑफिसमध्ये दुसऱ्याचं काम अंगावर पडलं, तरीही हो म्हणालात.
नातेवाईकाने पैसे मागितले, स्वतःकडे नसतानाही देता का असं विचारलं तर हो म्हणालात. जर असं होत असेल तर तुम्ही People Pleaser आहात.
सगळ्यांना हो म्हणणं सुरुवातीला चांगलं वाटतं. लोक म्हणतात किती चांगला माणूस आहे. पण हळूहळू याचा त्रास तुम्हालाच व्हायला लागतो. तुमचा वेळ, तुमचे पैसे, तुमची शांतता सगळं संपत जातं. आणि सगळ्यात वाईट गोष्ट म्हणजे तुम्ही हो म्हणता म्हणून लोक तुम्हाला गृहीत धरायला लागतात. तुम्हाला आदर मिळण्याऐवजी तुमचा वापर व्हायला लागतो.
मानसशास्त्र सांगतं की नाही म्हणता न येण्यामागे एकच भीती असते, ती म्हणजे लोक नाराज होतील ही भीती. आपल्याला वाटतं नाही म्हटलं तर समोरच्याला वाईट वाटेल, तो आपल्यापासून लांब जाईल. पण खरं तर जे लोक तुमच्या नाही म्हणण्याने दुरावतात, ते तुमचे मित्र कधीच नव्हते. खरे मित्र आणि कुटुंब तुमच्या मर्यादा समजून घेतात.
मग नाही म्हणायचं कसं? यासाठी भांडण करण्याची गरज नाही. फक्त तीन सोप्या पद्धती वापरा. पहिली पद्धत म्हणजे थेट नाही पण सॉफ्ट पद्धतीने सांगा. जसे की, मला तुला मदत करायला खरंच आवडलं असतं पण आज माझं आधीच एक काम आहे. दुसरी पद्धत म्हणजे वेळ मागून घेणे. लगेच हो न म्हणता मला थोडा विचार करून सांगू दे असं म्हणा. यामुळे तुम्हाला विचार करायला वेळ मिळतो. तिसरी पद्धत म्हणजे पर्याय देणे. मी हे काम नाही करू शकत पण यासाठी तुला दुसरी व्यक्ती सुचवू शकतो का?
लक्षात ठेवा, नाही म्हणणे म्हणजे स्वार्थी होणे नाही. तो स्वतःची काळजी घेण्याचा एक प्रकार आहे. जेव्हा तुम्ही नको असलेल्या गोष्टींना नाही म्हणता, तेव्हाच तुम्ही हव्या असलेल्या गोष्टींना हो म्हणू शकता. विमानातही आधी स्वतःचा ऑक्सिजन मास्क लावायला सांगतात, मग दुसऱ्याला मदत करा. आयुष्याचंही तसंच आहे. स्वतःला जपा, मगच दुसऱ्यांना जपू शकाल. त्यामुळे आजपासून एका छोट्या गोष्टीला तरी ठामपणे नाही म्हणून पहा, मन खूप हलकं वाटेल.