ବଲିଉଡ୍ରୁ ଆସିଛି ଏକ ଅତ୍ୟନ୍ତ ଦୁଃଖଦ ଖବର । ବଡ଼ ପରଦାରେ ନିଜର ଦମଦାର ଖଳନାୟକ ଚରିତ୍ରରେ ଦର୍ଶକଙ୍କ ମନ ଜିତିଥିବା ବରିଷ୍ଠ ଅଭିନେତା ପ୍ରଦୀପ ରାୱତ ଆଉ ନାହାନ୍ତି । 'ଗଜନୀ'ର ଗଜନୀ ହେଉ କି 'ଲଗାନ'ର ଦେବା, ତାଙ୍କ ଅଭିନୟ ଆଜି ମଧ୍ୟ ଦର୍ଶକଙ୍କ ମନରେ ଜୀବନ୍ତ । ୭୪ ବର୍ଷ ବୟସରେ ତାଙ୍କ ପରଲୋକ ସହ ବଲିଉଡ୍ ହରାଇଛି ଜଣେ ପ୍ରତିଭାବାନ କଳାକାର ।
ଆମିର ଖାନଙ୍କ ସୁପରହିଟ୍ ଫିଲ୍ମ 'ଗଜନୀ' ଏବଂ 'ଲଗାନ୍'ରେ ନିଜର ଦମଦାର ଅଭିନୟ ପାଇଁ ପରିଚିତ ବରିଷ୍ଠ ଅଭିନେତା ପ୍ରଦୀପ ରାୱତଙ୍କ ୭୪ ବର୍ଷ ବୟସରେ ପରଲୋକ ଘଟିଛି। ତାଙ୍କ ବିୟୋଗ ଖବର ସାମ୍ନାକୁ ଆସିବା ପରେ ଫିଲ୍ମ ଜଗତ ଏବଂ ତାଙ୍କ ଅସଂଖ୍ୟ ପ୍ରଶଂସକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି ।
ପ୍ରଦୀପ ରାୱତଙ୍କ ବିଜନେସ୍ ମ୍ୟାନେଜର ସିଦ୍ଧାର୍ଥ ତିୱାରୀ ତାଙ୍କ ମୃତ୍ୟୁ ଖବରକୁ ସ୍ପଷ୍ଟ କରିଛନ୍ତି । ସେ କହିଛନ୍ତି ଯେ, ପ୍ରଦୀପ ରାୱତ ଗତ ପାଞ୍ଚ ବର୍ଷ ଧରି ବ୍ଲଡ୍ କ୍ୟାନ୍ସରରେ ପୀଡ଼ିତ ଥିଲେ । ଚିକିତ୍ସା ପରେ ତାଙ୍କ ସ୍ୱାସ୍ଥ୍ୟରେ କିଛିଟା ସୁଧାର ଆସିଥିଲା, କିନ୍ତୁ କିଛି ମାସ ପୂର୍ବରୁ କ୍ୟାନ୍ସର ପୁଣିଥରେ ଫେରି ଆସିଥିଲା । ଗତ ଦୁଇ ମାସ ଧରି ସେ ହସ୍ପିଟାଲରେ ଭର୍ତ୍ତି ଥିଲେ ଏବଂ ଶେଷ କିଛି ଦିନ ଧରି ତାଙ୍କ ସ୍ୱାସ୍ଥ୍ୟ ଅବସ୍ଥା ଲଗାତାର ଖରାପ ହେଉଥିଲା । ଶେଷରେ ମଙ୍ଗଳବାର ସନ୍ଧ୍ୟାରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ପରିବାର ପକ୍ଷରୁ ବୁଧବାର ତାଙ୍କର ଶେଷକୃତ୍ୟ କରାଯିବାର ସମ୍ଭାବନା ରହିଛି ।
ପ୍ରଦୀପ ରାୱତ କେବଳ ହିନ୍ଦୀ ସିନେମାରେ ନୁହେଁ, ବରଂ ତେଲୁଗୁ, ତାମିଲ, କନ୍ନଡ ଏବଂ ମଲୟାଲମ ଚଳଚ୍ଚିତ୍ରରେ ମଧ୍ୟ ନିଜର ଦମଦାର ଅଭିନୟ ପାଇଁ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ନିଜ କ୍ୟାରିୟରରେ ସେ ଅନେକ ସ୍ମରଣୀୟ ଖଳନାୟକ ଚରିତ୍ରରେ ଅଭିନୟ କରି ଦର୍ଶକଙ୍କ ମନରେ ଏକ ସ୍ୱତନ୍ତ୍ର ସ୍ଥାନ ହାସଲ କରିଥିଲେ। ବିଶେଷ କରି ଆମିର ଖାନଙ୍କ 'ଗଜନୀ'ରେ ତାଙ୍କ ଚରିତ୍ର ଆଜି ମଧ୍ୟ ଦର୍ଶକଙ୍କ ମନରେ ରହିଛି । ସେହିପରି 'ଲଗାନ୍'ରେ ମଧ୍ୟ ତାଙ୍କ ଅଭିନୟ ଗଭୀର ଛାପ ଛାଡ଼ିଥିଲା ।
ପ୍ରଦୀପ ରାୱତଙ୍କ ବିୟୋଗ ଖବର ପରେ ସୋସିଆଲ ମିଡିଆରେ ପ୍ରଶଂସକମାନେ ତାଙ୍କୁ ଶ୍ରଦ୍ଧାଞ୍ଜଳି ଜଣାଉଛନ୍ତି । ଅନେକେ ତାଙ୍କ ଅଭିନୀତ ସ୍ମରଣୀୟ ଦୃଶ୍ୟ ଓ ସଂଳାପ ସେୟାର କରି ତାଙ୍କୁ ଭାରତୀୟ ସିନେମାର ଜଣେ ଶ୍ରେଷ୍ଠ କଳାକାର ବୋଲି ବର୍ଣ୍ଣନା କରୁଛନ୍ତି ।